სომხეთი და აზერბაიჯანი ცეცხლის შეწყვეტაზე შეთანხმდნენ. Reuters-ის ინფორმაციით, სომხეთის თავდაცვის სამინისტრომ განაცხადა, რომ შეთანხმება რუსეთის მედიაციით მოხდა.

"რუსული მხარის შუამავლობით გაფორმებული შეთანხმების თანახმად, სომხეთ-აზერბაიჯანის საზღვრის აღმოსავლეთ მონაკვეთზე ცეცხლი შეწყდა და ვითარება შედარებით სტაბილურია", — აცხდებს სომხეთის თავდაცვის სამინისტრო.

კრემლის განცხადებით, ვლადიმერ პუტინმა და სომხეთის პრემიერმინისტრმა, ნიკოლ ფაშინიანმა საზღვარზე მიმდინარე მოვლენები ტელეფონით საუბრისას განიხილეს. ამასთანავე, რუსეთის თავდაცვის მინისტრი სერგეი შოიგუ ტელეფონით ესაუბრა სომხეთისა და აზერბაიჯანის თავდაცვის მინისტრებს.

როგორც სომხეთის თავდაცვის სამინისტრო აცხადებს, მათ სამხედროებს ცეცხლი გაუხსნეს აზერბაიჯანიდან და 12 ჯარისკაცი ტყვედ ჩავარდა, ხოლო ორი აზერბაიჯანის საზღვართან დაიკარგა. სომხეთის პარლამენტის საგარეო ურთიერთობათა კომიტეტის ხელმძღვანელმა, ედუარდ აღაჯანიანმა კი განაცხადა, რომ დაიღუპა 15 სომეხი ჯარისკაცი.

რაც შეეხება აზერბაიჯანის მხარეს, თავდაცვის სამინისტრომ განაცხადა, რომ მათ უპასუხეს ფართომასშტაბიან "პროვოკაციებს" მას შემდეგ, რაც სომხურმა ძალებმა აზერბაიჯანის არმიის დანაყოფები დაბომბეს. სამინისტროს თქმით, მათი ოპერაცია წარმატებული იყო.

გუშინ, 16 ნოემბერს, ევროპული საბჭოს პრეზიდენტმა, შარლ მიშელმა აზერბაიჯანსა და სომხეთს სიტუაციის დეესკალაციისა და ცეცხლის შეწყვეტისკენ მოუწოდა. ტვიტერის ოფიციალურ გვერდზე მიშელი წერს, რომ ევროკავშირი, პარტნიორებთან ერთად, მუშაობს სამხრეთ კავკასიაში სტაბილურობის შენარჩუნებისთვის.

გაიგე მეტი: