20 მაისს HBO-ს ეთერში ახალ სატელევიზიო ფილმის The Wizard of Lies პრემიერა შედგება, რომელშიც მთავარ როლებს რობერტ დე ნირო და მიშელ პფაიფერი ასრულებენ.

ფილმი ნამდვილ ამბავზეა დაფუძნებული და ის ბერნარდ "ბერნი" მეიდოფის ამბავს მოგვითხრობს. მეიდოფს ბრალი 11 მუხლით ჰქონდა წაყენებული. 2009 წლის 12 მარტს მან აღიარა დანაშაული, რომელიც ასობით ინვესტორის მოტყუებას მოიცავდა. ინვესტორთა დანაკარგები ფედერალური გამომძიებლების გამოთვლით $65 მილიარდს აღემატებოდა.

ბრალდების წაყენების შემდეგ მეიდოფი საკუთარ პენტჰაუსში შინაპატიმრობაში იმყოფებოდა, თუმცა დანაშაულის აღიარების შემდეგ ის საპყრობილეში გადაიყვანეს. ამ დანაშაულისთვის მას სამუდამო პატიმრობა მიესაჯა.

HBO-ს ტელეფილმი მიშელ პფაიფერის ერთადერთი ახალი პროექტი არ არის. ის დარენ არანოვსკის ახალ ფილმში, დედა, ითამაშებს. მასთან ერთად, მთავარ როლებს ჯენიფერ ლოურენსი, ედ ჰარისი და ხავიერ ბარდემი შეასრულებენ.

როგორც ხედავთ, მიშელ პფაიფერი ხანგრძლივი პაუზის შემდეგ აქტიურად უბრუნდება კინოკარიერას. გარდა ამ ორი პროექტისა, ის აგატა კრისტის დეტექტივის ეკრანიზაციაშიც მიიღებს მონაწილეობას. მიშელი აქამდე სამჯერ იყო ოსკარის ნომინანტი, თუმცა კინოაკადემიის მთავარი პრიზი ვერ აიღო.

ფოტო: Mikael Jansson/ Interview

"რა ჯანდაბა დაემართა მიშელ პფაიფერს?" ამ სათაურით სხვადასხვა ჟურნალებში არაერთი სტატია თუ მოსაზრება დაწერილა. "მე გავქრი" - არაერთხელ უთქვამს ეს ფრაზა თავად მსახიობს. ამის მიზეზად კი პირად ცხოვრებასა და ჰოლივუდში გამეფებულ სტანდარტებს ასახელებს.

რატომ ბრუნდება ფაიფერი 58 წლის ასაკში?

როგორც მსახიობი ამბობს, დარენ არანოვსკიმ არაჩვეულებრივი როლი შესთავაზა, მრავალწლიანი პაუზის შემდეგ კი ეს დაბრუნების საუკეთესო საშუალება იყო.

"კინოს სიყვარული არ დამიკარგავს. გადასაღებ მოედანზე თავს ისე ვგრძნობ როგორც საკუთარ სახლში და ბევრად უფრო დაბალანსებული, საყვარელი და კარგი ვარ, როდესაც ვმუშაობ. დამიჯერეთ, ასეა", - ამბობს მიშელი.

ფოტო: Mikael Jansson/Interview

"როდესაც ოჯახი გყავს, უფრთხილდები მას. აკვირდები რამდენი დრო დაგჭირდება გადაღებებისთვის, შეძლებ თუ არა ბავშვებისგან მოშორებით მუშაობას, აკვირდები ყველა დეტალს, დრო კიდევ უმოწყალოდ გადის", - უთხრა ჟურნალ Interview-ს პფაიფერმა.

დრო უმოწყალოდ გადის, მაგრამ პფაიფერის სილამაზე არ შეცვლილა. როგორც 2011 წელს ჟურნალ Elle-ს უთხრა, მისი გარეგნობის გამო ხშირად შეუთავაზებიათ როლები, ამის მაგალითად კი ბეტმენში ქალი კატას როლი მოჰყავს.

"დიდი პაუზა მქონდა და ძალიან მეშინია. არ დავმალავ, ჰოლივუდმა თავის დროზე გამრიყა, ზურგი შემაქცია და ახლა ჩემს კარიერასთან დაბრუნების მეშინია. გადასაღები მოედანი ზღაპარს ჰგავს, მაგრამ ხანდახან მგონია, რომ მზად არ ვარ. რაღაცებს ახლაც ვსწავლობ, მაგრამ ვგრძნობ, რომ ეს ის გრძნობაა, რომელიც წლების წინ გადასაღებ მოედანზე პირველად მოხვედრის დროს დამეუფლა და ახლა არ ვიცი, ვარ თუ არა მზად ამ გზის თავიდან გასავლელად. მეშინია ყალბი არ ვიყო", - ამბობს მსახიობი.

ყალბი? სავარაუდოდ მიშელმა არ იცის, როგორი ბედნიერია ხალხი მისი კინოში დაბრუნებით.