"ამბობენ, რაღაცები არასდროს იცვლებაო", — ეს არის ფრაზა, რომელსაც Sex and the City-ის ახალი სეზონის პირველ თიზერში ვისმენთ. და, მართალიცაა, ორი ათწლეულის გასვლის მიუხედავად, ზუსტად ისე აგვიფანცქალდა გულები თრეილერის პირველი კადრის ნახვისას, როგორც მაშინ, კერი ბრედშოუს რომ პირველად გადავეყარეთ.

მოკლედ, პოპულარული სერიალის გაგრძელების — And Just Like That (და, აი, სწორედ ასე) — პირველი თრეილერი სულ ცოტა ხნის წინ გამოვიდა. გავიგეთ ახალი სეზონის გამოსვლის თარიღიც — კალენდარზე სასწრაფოდ და საგანგებოდ მონიშნეთ 9 დეკემბერი.

მართალია, ყველაფერს ერთ თვეზე ნაკლებ დროში გავიგებთ, თუმცა, ამ დროისთვის ბევრი რამ სულაც არ ვიცით სერიალის გაგრძელებაზე. ვიცით ერთი ის, რომ ათსერიან სეზონში ლეგენდარული ქასთი — სარა ჯესიკა პარკერი, სინთია ნიქსონი და კრისტინ დეივისი — დაბრუნდა (კიმ კეტრელმა კი უარი თქვა) და კიდევ ის, რომ ახალ სეზონში "50 წლის ასაკს გადაცილებული ნაცნობი პერსონაჟების რთულ ცხოვრებისეულ რეალობასა და მეგობრობაზე" ვიხილავთ ისტორიებს. თუმცა, სიახლეებთან ერთად, ძველებურ გარემოსაც კვლავინდებურად ვიგრძნობთ.

"სერიალის შემქმნელები გამოცდილი ხალხია და პერსონაჟებს კარგად იცნობენ, იაზრებენ, რომ მათ ცხოვრებაშიც ხდება სიახლეები", — განაცხადა პარკერმა Vogue-თან ინტერვიუში, — "თუმცა, ეს ყველაფერი მაინც სერიალის ძველ, ჩვენთვის საყვარელ განწყობაში ჯდება. მარტო სამოსია ისეთი, რომ გადაირევით. და, ბარემ, იმასაც გეტყვით, რომ სერიალის ახალ ვერსიაშიც დიდი დოზითაა სექსი".

აღსანიშნავია ისიც, რომ მონატრებულ პერსონაჟებს შორის ვიხილავთ სტენფორდსაც, რომლის როლსაც უილი გარსონი ასრულებდა. გარსონისთვის ეს ერთ-ერთი ბოლო პროექტია — მსახიობი რამდენიმე თვის წინ გარდაიცვალა 57 წლის ასაკში.

სერიალი სექსი დიდ ქალაქში 2004 წელს დასრულდა, მასზე გადაღებული მეორე ფილმი კი 2010 წელს გამოვიდა.

ასევე იხილეთ: