ქართული კივის საცდელი პარტია კომპანია ნერგეტამ იაპონიის სუპერმარკეტების ქსელებში შეიტანა. ამის შესახემ, ინფორმაციას eugeorgia.info ავრცელებს.

იგივე გამოცემა კომპანიის თანადამფუძნებლის, კონსტანტინე ვეკუას ინფორმაციით წერს, რომ ქართული კივი უკვე წარმატებით გაიყიდა ისეთ დიდ ქალაქებში, როგორიცაა, ტოკიო, ოსაკა, კიოტო, ჰიროშიმა, ნაგასაკი და ფუკუოკა.

მეწარმის განცხადებით, პირველ ეტაპზე, ერთი 22 ტონა კივი გაგზავნეს იაპონიაში და პროდუქციამ დანიშნულების ადგილზე უვნებლად ჩააღწია, პარტნიორი იაპონური ხილის სადისტრიბუციო კომპანია კი კმაყოფილია მომხმარებელთა და ქსელების შეფასებით.

კომპანიის წარმომადგენლის განცხადებით, მომავალი სეზონისთვის, საექსპორტო სტანდარტის საქონელი სრულად მოითხოვეს.

კომპანია ნერგეტა 2009 წელს დაფუძნდა და ფლობს 24 ჰა-ზე გაშენებულ კივის პლანტაციას, ასევე, ხილის სორტირებისა და სამაცივრე მეურნეობას ზუგდიდის რაიონის სოფლებში, ინგირსა და კახათში. კომპანიამ პირველად ქართული კივი გერმანიაში ექსპორტზე გაიტანა. „ნერგეტას“ ბრენდით კივი ცნობილი სუპერმარკეტების ქსელში Lidl იყიდებოდა.