პარტია გირჩის ლიდერი ვახტანგ მეგრელიშვილი ამბობს, რომ ეს არა თვითმმართველობის, არამედ "მიშა ციხეში უნდა მჯდარიყო თუ არა" ეგ არჩევნები იყო. ამის შესახებ მან პარლამენტის პლენარულ სხდომაზე ისაუბრა.

"ეს არჩევნები არ იყო. სამწუხაროდ, მიშა ციხეში უნდა მჯდარიყო თუ არა ეგ არჩევნები იყო, ხომ იცით და ხომ ვიცით ყველამ. ნახეთ, რა მოხდა, თითქმის 50-50-ზე ითამაშეთ თქვენ და ნაციონალურმა მოძრაობამ", — თქვა მეგრელიშვილმა.

მეგრელიშვილმა, ასევე, აღნიშნა, რომ პარლამენტის სესიაზე მმართველ გუნდს რიტორიკა შეცვლილი ჰქონდა. მისივე თქმით, ასეც უნდა იყოს, სხვა შემთხევაში, სულ იქნება რისკი, რომ ხელისუფლების ცვლილება სამკვდრო-სასიცოცხლო ბრძოლის მიზეზი გახდეს.

"ამიტომ არის მნიშვნელოვანი, რომ ისეთი საზოგადოება შევქმნათ, ისეთი მდიდარი, რომ მსგავსი რადიკალური მოქმედებების მხარდაჭერა აღარ იყოს საჭირო — შევინარჩუნოთ თუ არა ბანძი მშვიდობა, რომელიც დღეს გვაქვს. ამის შემდეგ, თუ ჩვენ დავიწყებთ ბევრ თემაზე საუბარს, შეიძლება, აღმოჩნდეს, რომ პოლიტიკურად მომგებიანია საუბარი, ნაცვლად ლანძღვა-გინებისა და ამით, შეიძლება, თქვენ, ხელისუფლებამ კიდევ მეტი პოზიტივი მიიღოთ", — განაცხადა მან.

30 ოქტომბერს საქართველოში ადგილობრივი თვითმმართველობის არჩევნები ჩატარდა. ცესკომ წინასწარი შედეგები გამოაქვეყნა, რის მიხედვითაც წალენჯიხა ერთადერთი მუნიციპალიტეტია, სადაც ოპოზიციის კანდიდატი იგებს. სხვა დიდ ქალაქებსა და თვითმმართველ თემებში მმართველი გუნდის კანდიდატები იგებენ ან ლიდერობენ.