ევროპული საქართველოს თავმჯდომარის, გიგა ბოკერიას განცხადებით, საჭიროა მშვიდობიანი საპროტესტო აქციები, თუმცა ლოზუნგს, რომ არჩევნები გაუქმებულია, პარტია მცდარად მიიჩნევს. ბოკერიას თქმით, ისეთი ავტორიტარული რეჟიმის ცვლილებას, როგორიც ივანიშვილის რეჟიმია, ძალიან ბევრი მხარდამჭერის მოპოვება სჭირდება.

"ასეთ ვითარებაში, ასეთი ავტორიტარული რეჟიმის წინააღმდეგ ბრძოლას სჭირდება კომპლექსური და თანმიმდევრული მიდგომა, რომლის აუცილებელი ნაწილია მშვიდობიანი საპროტესტო აქციები, მაგრამ აქვე მინდა წინასწარ საზოგადოებამაც იცოდეს ევროპული საქართველოს პოზიცია, ჩვენმა პარტნიორებმაც კონსულტაციებამდე იცოდნენ, რომ ლოზუნგი "არჩევნები გაუქმებულია" ჩვენ მცდარად მიგვაჩნია არსებითად და პრაგმატულად. მინდა ყველას შევახსენო, რომ ასეთი სახიფათო, ავტორიტარული რეჟიმების, როგორიც ივანიშვილის რეჟიმია, არასაარჩევნო გზით შეცვლას ბევრად მეტი მხარდამჭერის მოპოვება სჭრიდება საზოგადოებისგან და მოსახლეობისგან, ვიდრე საარჩევნო პროცესში არალეგიტიმური და ძალადობრივი მეთოდების გადალახვას", — აცხადებს ბოკერია.

ევროპული საქართველოს თავმჯდომარემ, ასევე განაცხადა, რომ ოპოზიციამ საზოგადოებას წარმატების სწრაფად მიღწევის მოლოდინი არ უნდა შეუქმნას, პირიქით, უნდა მოემზადოს თანმიმდევრული და არამოკლევადიანი ბრძოლისთვის.

"ჩვენ საზოგადოებას არ უნდა შევუქმნათ მოლოდინი სწრაფ წარმატებაზე, სამწუხაროდ, ეს არის რეალობა. ჩვენ უნდა ვიყოთ მზად თანმიმდევრული, სამწუხაროდ, როგორც ჩანს, არამოკლევადიანი ბრძოლისთვის და ამ წარუმატებლობამ, ამ ეტაპზე არავითარ შემთხვევაში არ უნდა ჩაგვაგდოს სასოწარკვეთაში, იმიტომ, რომ ეს განცხადებები, რომ აღარ შეგვიძლია მოთმენა და რაღაც უნდა ვქნათ, პირიქით, ხელს უწყობს ივანიშვილის რეჟიმის მხრიდან ნიჰილიზმის დამყარებას და სასოწარკვეთაში საზოგადოების ჩაგდებას", — ამბობს ბოკერია.

ცენტრალურმა საარჩევნო კომისიამ ყველა ქალაქსა და თვითმართველ თემში მერობის კანდიდატებისთვის მიცემული ხმების 100% დათვალა. შედეგების მიხედვით, წალენჯიხა ერთადერთი მუნიციპალიტეტია, სადაც ნაციონალური მოძრაობის კანდიდატი იგებს, სხვა ყველგან — ქართული ოცნება.

ოპოზიცია დღეს, 19:00 საათზე პარლამენტთან აქციას გეგმავს. ნაციონალური მოძრაობის თავმჯდომარის, ნიკა მელიას განცხადებით, ისინი სამოქმედო გეგმის წარდგენას აპირებენ. მისი თქმით, არავის უნდა ჰქონდეს ილუზია, რომ "მოპარული არჩევნები" რომელიმე ხელისუფალს შერჩება. აქციას უერთდება მოძრაობა სირცხვილიაც.