დროას ლიდერის, ელენე ხოშტარიას განცხადებით, ხმების დათმობას არ აპირებენ და ბოლომდე იბრძოლებენ.

"ჩვენ არ ვაპირებთ ამ არჩევნების დათმობას, არ ვაპირებთ ჩვენი ამომრჩევლის ხმების დათმობას, ჩვენ ვიბრძოლებთ ბოლომდე, ვიბრძოლებთ აბსოლუტურად ყველა სამართლებრივი და სხვადასხვა გზით და ვაფრთხილებთ ქართულ ოცნებას — მოეშვას წინასწარ მანიპულირებული ტყუილი განწყობის შექმნას", — განაცხადა ხოშტარიამ.

მისივე თქმით, უბნებზე ბრძოლა გაგრძელდება. ხოშტარია აღნიშნავს, რომ ქართული ოცნება სხვადასხვა უბანზე სიტუაციის არევას ცდილობს. მისივე თქმით, მმართველი პარტია "თავისივ ტყუილებშიც" ვერ საუბრობს დამაჯერებელ გამარჯვებაზე.

"ჩვენ ვხედავთ, ცესკოს საიტზე ხდება აბსოლუტურად მანიპულირებული, უმეტესად მხოლოდ ქართული ოცნების უპირატესობის ამსახველი უბნების ატვირთვა. მეორე — გამოვიდა კობახიძე და არ ვიცით საიდან, მოიგონა აბსოლუტური ტყუილი, თითქოს ქართულმა ოცნებამ მოიგო უმრავლესი ქალაქები.

თავისივე ტყუილში ჩვენ ვნახეთ, რომ ლაპარაკი არის 1, 2, 3 პროცენტიან უპირატესობაზე, რაც მთლიანობაში მეტყველებს აბსოლუტურად დანგრეულ ლეგიტიმაციაზე. ქართული ოცნება თავისივე ტყუილებში დამაჯერებელ გამარჯვებაზე ვერ საუბრობს, მაგრამ კარგად უნდა გვესმოდეს, ღამე ამ ციფრების ბრახუნი ემსახურება ერთადერთ რამეს — გატეხონ ჩვენი დამკვირვებლების, ჩვენი მებრძოლი ხალხის განწყობა და მოატყუონ საზოგადოებას, რომ თითქოს ქართულ ოცნებას აქვს უპირატესობა და მიიტაცონ კიდევ ერთხელ არჩევნები", — თქვა ელენე ხოშტარიამ.

ქართული ოცნების თავმჯდომარემ, ირაკლი კობახიძემ განაცხადა, რომ როდესაც 100 000 ხმით აქვს ოპოზიციას ქალაქში არჩევნები წაგებული, ხმის დაცვაზე ვერ იქნება საუბარი. მისივე თქმით, ოპოზიციამ ე.წ. რეფერენდუმის მეორე ტურში ყველაფერი წააგო.

ნახეთ არჩევნების მეორე ტურის შედეგები დეტალურად On.ge-ზე: