არასამთავრობო ორგანიზაცია, "საერთაშორისო გამჭვირვალობა საქართველოს" (TI) თანახმად, ფოთის საარჩევნო ოლქის #7 უბანზე კომისიის თავმჯდომარე, ზაველი ღაღანიძე ფიზიკური ანგარიშსწორებით ემუქრებოდა დამკვირვებელს.

საერთო ჯამში, ორგანიზაციამ 13:30 საათისთვის თვითმმართველობის არჩევნების მეორე ტურში 50-მდე წვრილი და შედარებით სერიოზული დარღვევა დააფიქსირა.

"საერთაშორისო გამჭვირვალობის" დამკვირვებლებმა ამ დროისთვის 8 საჩივარი დაწერეს. მნიშვნელოვანი დარღვევებიდან TI შემდეგ ფაქტებს გამოყოფს:


კენჭისყრის შენობიდან 100 მეტრის რადიუსის დარღვევა

მთელი ქვეყნის მასშტაბით ბევრი საარჩევნო უბნის გარეთ 100 მეტრის მანძილზე, პირველი ტურის მსგავსად, შეინიშნება პარტიული კოორდინატორების თავშეყრა, რაც საარჩევნო კოდექსში შესული ახალი ცვლილებებით, სამართალდარღვევას წარმოადგენს.

საარჩევნო უბანზე მოსული ამომრჩევლის აღნუსხვა

  • #79 ბათუმის, #17 თელავის და #20 რუსთავის საარჩევნო ოლქების ბევრ უბანზე ნაკადის მომწესრიგებელი მოსული ამომრჩევლის ვინაობას ხმამაღლა აცხადებდა, რასაც უბანზე მყოფი სხვადასხვა უფლებამოსილი პირი ინიშნავდა და აგზავნიდა;
  • #20 რუსთავის საარჩევნო ოლქის #66 უბანზე ამომრჩეველთა რეგისტრატორები მოსული ამომრჩევლის რიგით ნომრებს ცალკე ინიშნავდნენ. მათი თქმით, ამას ისინი კომისიის თავმჯდომარის დავალებით აკეთებდნენ. TI-ის დამკვირვებლის მითითების შემდეგ რეგისტრატორებმა შეწყვიტეს ეს ქმედება.

დამკვირვებლების საქმიანობისთვის ხელის შეშლა

#25 ფოთის საარჩევნო ოლქის #7 უბანზე ორგანიზაციის დამკვირვებელს არ აძლევდნენ პროცესებზე დაკვირვების შესაძლებლობას და გამოაძევეს უბნიდან. ამ უბნის კომისიის თავმჯდომარე, ზაველი ღაღანიძე ფიზიკური ანგარიშსწორებით ემუქრებოდა დამკვირვებელს, ასევე, აგრესიულობით გამოირჩეოდა ამავე უბანზე მყოფი ფოთის საოლქო საარჩევნო კომისიის წევრი, ნათია ჩიკვაიძე.

საარჩევნო უბანზე ამომრჩევლის მარკირების გარეშე შეშვება

#69 ჩხოროწყუს ოლქის #15 უბანზე 10-მდე ამომრჩეველი მარკირების შემოწმების გარეშე დაუშვეს უბანზე. ორგანიზაციამ საჩივარი დაწერა და კომისიის თავმჯდომარისა და ნაკადის მომწესრიგებელი კომისიის წევრის მიმართ დისციპლინური პასუხისმგებლობა მოითხოვა.

ჟურნალისტური საქმიანობისთვის ხელის შეშლა

#67 ზუგდიდის საარჩევნო ოლქის #5 და #81 უბნების მიმდებარედ ტელეკომპანია "ფორმულას" ჟურნალისტს, დავით მანიას, "ქართული ოცნების" კოორდინატორები ხელს უშლიდნენ პროფესიული საქმიანობის შესრულებაში; პოლიცია ადგილზე იყო, თუმცა ჟურნალისტის უფლებების დარღვევაზე სათანადოდ არ რეაგირებდა.

სადამკვირვებლო ორგანიზაციების დამკვირვებლების მიერ ჩადენილი დარღვევები

  • #67 ზუგდიდის საარჩევნო ოლქის უბნებზე ტენდენციის სახე ჰქონდა სადამკვირვებლო ორგანიზაციების, "კავშირი მწვანე დედამიწის" და "საზოგადოებრივი გაერთიანება ჯერ საქართველოს" რამდენიმე დამკვირვებლის ერთსა და იმავე უბანზე ერთდროულად ყოფნას, რაც კანონით არ არის დაშვებული. "საერთაშორისო გამჭვირვალობის" დამკვირვებლების მითითების შემდეგ, კომისიის თავმჯდომარე ზედმეტ დამკვირვებელს უბნიდან უშვებდა.
  • #79 ბათუმის საარჩევნო ოლქის #2 უბანზე სადამკვირვებლო ორგანიზაციის, "ახალგაზრდები ევროპული მომავლისთვის" დამკვირვებელი დიდი ხნის განმავლობაში ნაკადის მომწესრიგებლის გვერდით იდგა, ყველა ამომრჩეველს ეკითხებოდა სახელს და გვარს და ინიშნავდა მათ ვინაობას.

დღეს, 30 ოქტომბერს ადგილობრივი თვითმმართველობის არჩევნების მეორე ტური გაიმართება. მერი 15 თვითმმართველ თემსა და 5 თვითმმართველ ქალაქში, მათ შორის, თბილისში აირჩევა. გარდა ამისა, მეორე ტური გაიმართება 24 საარჩევნო ოლქში, რომლის შედეგად აირჩევა 42 მაჟორიტარი.

არჩევნების შესახებ ყველა სიახლეს შეგიძლიათ On.ge-ზე გაეცნოთ: