საქართველოს საკონსტიტუციო სასამართლო საგადასახადო უთანასწორობის საკითხზე სარჩელს არსებითად განიხილავს. მოსარჩელეები ლათინ კათოლიკეთა კავკასიის სამოციქულო ადმინისტრაცია, საქართველოს ევანგელურ-ბაპტისტური ეკლესია, ქართველ მუსლიმთა კავშირი, საქართველოს სახარების რწმენის ეკლესია, მეშვიდე დღის ქრისტიან-ადვენტისტთა ეკლესიის ტრანსკავკასიური იუნიონი, საქართველოს სიცოცხლის სიტყვის ეკლესია, წმიდა სამების ეკლესია და ქრისტეს ეკლესია არიან. სასამართლომ სარჩელის დასაშვებობაზე 23 მარტს იმსჯელა.

გასაჩივრებული რეგულაციებია:

  • სიტყვები, რომლებიც მხოლოდ საქართველოს საპატრიარქოს მიერ გამოყენებული რელიგიური დანიშნულების ნივთების რეალიზაციით მიღებულ მოგებას ათავისუფლებს გადასახადიდან და სხვა რელიგიურ გაერთიანებებს - არა;
  • სიტყვები, რომლებიც მხოლოდ დომინანტ რელიგიურ გაერთიანებას ათავისუფლებს დამატებული ღირებულების გადასახადისგან, საღვთისმსახურო საგნების მიწოდების შემთხვევაში და რეგულაცია, რომლითაც გათავისუფლებულია ეკლესიებისა და ტაძრების რესტავრაცია, მშენებლობა და მოხატვა მხოლოდ იმ შემთხვევაში, თუ ხორციელდება საქართველოს საპატრიარქოს დაკვეთით;
  • რელიგიური გაერთიანებების საკუთრებაში არსებულ მიწის ნაკვეთების დაბეგვრის ობიექტად განხილვა და, შესაბამისად, არ გათავისუფლება ქონების გადასახადისგან მაშინ, როცა მართლმადიდებელი ეკლესია გათავისუფლებულია ამგვარი გადასახადისგან.