მიუხედავად იმისა, რომ თბილისობა წელს აღარ ჩატარდა და დაგეგმილი ღონისძიებებისთვის გამოყოფილი თანხა ბათუმში საცხოვრებელი კორპუსის ჩამონგრევის შედეგად დაზარალებულებს გადაერიცხათ, დედაქალაქის საპატიო მოქალაქეები მაინც დაჯილდოვდნენ. ღონისძიება თბილისის საკრებულოში გაიმართა. დაჯილდოვებამდე შეკრებილებს თბილისის მოქმედმა მერმა და მერობის კანდიდატმა, კახა კალაძემ მიმართა.

"თბილისს უამრავი საზოგადო მოღვაწე, მეცნიერი, ხელოვანი, სპორტსმენი თუ ექიმი აღუზრდია, თბილისში ბევრი ისეთი პროფესიის ადამიანიც ცხოვრობს, რომლის საქმიანობაც, ერთი შეხედვით, უშუალოდ თითქოს არ უნდა იყოს დაკავშირებული ადამიანების გადარჩენასთან, დახმარებასთან, ან რაიმე სხვა განსაკუთრებული ნიშნით გამორჩევასთან, თუმცა თბილისმა ყველას გვასწავლა, რომ პროფესია კი არ გამოარჩევს ადამიანს, არამედ ადამიანი გამოარჩევს პროფესიას, თავისი გულწრფელი, უანგარო, საკუთარი ხალხის, ქვეყნის და ქალაქისადმი სიყვარულით აღსავსე ქმედებებით და ცხოვრების წესით", — განაცხადა კახა კალაძემ.

თბილისის საპატიო მოქალაქეები გახდნენ:

• რისმაგ გორდეზიანი — მეცნიერი, ფილოლოგი, საქართველოს მეცნიერებათა ეროვნული აკადემიის წევრი, აკადემიკოსი;
• აკაკი ნადარეიშვილი — ექიმი, მედიცინის მეცნიერებათა დოქტორი, პროფესორი;
• ირაკლი ფავლენიშვილი — ექიმი, მედიცინის მეცნიერებათა დოქტორი, პროფესორი;
• რამაზ ყურაშვილი — ექიმი-ენდოკრინოლოგი, მედიცინის მეცნიერებათა დოქტორი, პროფესორი;
• დავით კვაჭაძე — ფოტოგრაფი, კრივის სამგზის ჩემპიონი და სპორტის დამსახურებული ოსტატი;
• ლილი კინწურაშვილი — ქალაქის დასუფთავების სამსახურის ადამიანური რესურსების მართვის სამსახურის მთავარ სპეციალისტი, რომელიც უკვე 49 წელია მუნიციპალიტეტს ემსახურება;
• ელგუჯა ბურდული — მსახიობი, საქართველოს კინემატოგრაფისტთა კავშირის წევრი;
• პაატა კერვალიშვილი — ფიზიკოსი, ფიზიკა-მათემატიკის მეცნიერებათა დოქტორი, მსოფლიოს წამყვან სახელმწიფოებში აღიარებული მეცნიერი ატომური ენერგიის მიმართულებით;
• ინგა ჯიბუტი — ენისა და ლიტერატურის სპეციალისტი, ტერმინოლოგი, საქართველოს ტერმინოლოგთა ასოციაციის თანადამფუძნებელი;
• ბადრი ქუთათელაძე — მწერალი, პოეტი და მკვლევარი; ილია ჭავჭავაძის, ნიკო ნიკოლაძის, გალაკტიონ ტაბიძის პრემიების ლაურეატი; საქართველოს მწერალთა კავშირის წევრი; ღირსების ორდენის კავალერი;
• გრიგოლ ჩიგოგიძე — თეატრმცოდნე და ჟურნალისტი, ახალგაზრდა კინომოყვარულთა საერთაშორისო ფესტივალის თბილისური აისის დამფუძნებელი და ჟურნალისტთა საერთაშორისო ფონდ ოქროს ფრთის ლაურეატი;
• დავით მუსხელიშვილი — ისტორიკოსი, ისტორიის მეცნიერებათა დოქტორი, პროფესორი, აკადემიკოსი.
• გივი ღამბაშიძე — პროფესიით ზეინკალი, რომელიც სხვადასხვა დროს თბილისის მეტროპოლიტენში ზეინკლად და სამურნეო საამქროს თანამშრომლად მუშაობდა. გივი ღამბაშიძის თაოსნობით განაშენიანდა საწარმოო ტერიტორია და გაიმართა შესაბამისი ინფრასტრუქტურა. წლების განმავლობაში ის შეუცვლელ როლს ასრულებდა თბილისის მეტროპოლიტენის გამართულად მუშაობაში.

თბილისობა 2021-ში, რომელიც ეპიდვითარების გამო ონლაინ უნდა ჩატარებულიყო, თითქმის ნახევარი მილიონის დახარჯვა იგეგმებოდა.