პირველი საუნივერსიტეტო კლინიკის დირექტორის, ლევან რატიანის განცხადებით, თუ კორონავირუსის შემთხვევების რაოდენობა დღევანდელი ტემპით გაიზრდება, ქვეყანაში საწოლფონდის პრობლემა დადგება და უახლოეს პერიოდში არც ერთი საწოლი აღარ იქნება თავისუფალი.

"დღიურად 5 000 ინფიცირებული, დაახლოებით, 15% საშუალოდ, თავსდება ჰოსპიტალურ სექტორში. აღნიშნულიდან გამომდინარე, ჯერჯერობით, საწოლფონდის პრობლემა არ დგას, მაგრამ დადგება აუცილებლად თუ [შემთხვევები] ასე გაიზარდა, ამ ტემპით, და უახლოეს პერიოდში, ალბათ, საქართველოში არც ერთი საწოლი არ იქნება თავისუფალი.

ჩვენი კლინიკის მაგალითით მინდა გითხრათ, რომ ბოლო 12 დღეა, არც ერთი თავისუფალი ადგილი კლინიკას არ გააჩნია. აღნიშნულიდან გამომდინარე, ეს ცუდი ინდიკატორია", — განაცხადა რატიანმა რუსთავი 2-ის ეთერში.

რატიანის თქმით, პანდემიის არც ერთი ტალღა ისეთი მაღალი მაჩვენებლით არ დაწყებულა, როგორც — მეხუთე.

"რაც წინა პერიოდში მახსოვს და გადავხედე, ასეთი მაღალი ციფრით არცერთი ტალღა არ დაწყებულა. თუ ეს ტალღის დასაწყისია, როგორც ეპიდემიოლოგები გვეუბნებიან, წარმომიდგენია რა იქნება პიკის ფაზაში", — ამბობს ლევან რატიანი.

21 ოქტომბრის მონაცემებით, საქართველოში კორონავირუსის 4 411 ახალი შემთხვევა დადასტურდა, გამოჯანმრთელდა — 2 896, ხოლო გარდაიცვალა 29 ადამიანი.

რაც შეეხება დადებითობის მაჩვენებელს, 20 ოქტომბრის მდგომარეობით, დადებითობის დღიური მაჩვენებელი არის 8,21%, ბოლო 14 დღის — 8,83% ხოლო 7 დღის — 9,05%.

პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 680 182-ს, გამოჯანმრთელებულთა რაოდენობა გაიზარდა 622 181-მდე, ხოლო დღემდე ვირუსს 9 617 პირი ემსხვერპლა.