გირჩის ლიდერი, ალექსანდრე რაქვიაშვილი თბილისის ვიცე-მერის პოსტზე გირჩი –— მეტი თავისუფლების კანდიდატის, ცოტნე კობერიძის ზურაბ ჯაფარიძით ჩანაცვლებას "გადაგდებად" აფასებს. მისი განცხადებით, პოლიტიკაში ეს "მოსულა", მაგრამ "თანაპარტიელების თუ თანაკოალიციიის წევრების გადაგდებით" პარტია დამატებით ხმას ვერ მიიღებს.

"ჩვენ სხვადასხვა პარტიაში ვართ უკვე, მაგრამ ადამიანი დღეს საღამომდე, ფაქტობრივად, მიიჩნევდა, რომ ვიცე-მერობის კანდიდატი იყო. ამომრჩეველს ამას ეუბნებოდნენ.

მე არ უნდა ავხსნა ეს, იმათ თვითონ უნდა ახსნან და ჩემი გადასახედიდან, უბრალოდ, ჩვეულებრივად გადააგდეს, როგორც პოლიტიკაში მოსულა. უბრალოდ, აი, გირჩში ასე არ ხდებოდა ზოგადად და სამწუხაროა, რომ ვიღაცას შეიძლება, ეს რაც ხდება, რაღაცნაირად გირჩთან ასოცირება ჰქონდეს", — განაცხადა მან პალიტრანიუსის ეთერში.

წამყვანმა რაქვიაშვილს ჰკითხა, დაკარგა თუ არა გირჩი — მეტი თავისუფლებამ ამით საკუთარი იდენტობა, რასაც რაქვიაშვილი დაეთანხმა და თქვა, რომ გირჩი იბრძოდა იდეებისთვის და არა პოლიტიკური თანამდებობისთვის. მისი შეფასებით, ეს ისტორია გამაოგნებელია.

"ახლა არც კი წარმომედგინა აქ რომ ვისხედით ერთად და აზრადაც არ მომივიდოდა, რომ ცოტნეს გარდა ვიღაცას დავინახავდი იქ, მიუხედავად იმისა, ჩვენ ვიცოდით, რომ ზურას სთავაზობდნენ ამ პოზიციას ჯერ კიდევ რაღაცა გაზაფხული თუ ზაფხული... ზაფხულში იყო ამაზე საუბარი. ამიტომ ჩემთვის გამაოგნებელია ეს ისტორია", — აღნიშნა მან.

დაახლოებით 2 თვის წინ, 12 ოქტომბერს გირჩი — მეტი თავისუფლებამ თბილისის ვიცე-მერობის კანდიდატის შესარჩევად პრაიმერისი ჩაატარა, რომელშიც ცოტნე კობერიძემ გაიმარჯვა. კობერიძეს მხარს უჭერდა ნაციონალური მოძრაობაც.

თუმცა, 20 ოქტომბერს, როცა ოპოზიციამ ე.წ. ჩრდილოვანი მთავრობა წარადგინა, ცნობილი გახდა, რომ ამ კანდიდატურაზე კობერიძეს მისივე თანაგუნდელი და პარტიის ხელმძღვანელი ზურაბ ჯაფარიძე ჩაანაცვლებს. კობერიძის განცხადებით, ამ საკითხზე "დილით ისაუბრეს" და გაიგო, რომ მეორე ტურში სხვა პარტიის ლიდერებიც ერთვებიან. მისი აზრით, ამ პროცესისთვის ჯაფარიძის როლი დიდი ფაქტორია. კობერიძე აცხადებს, რომ ახლა მთავარი ხმების მობილიზებაა და ამას ჯაფარიძე მასზე "კარგად იზამს".