თაფლობისთვის წვეულება უკრაინაში მოულოდნელად გადაიქცა ტრაგიკულ ამბად. რამდენიმე კვირის წინ, კარპატების მთებში ნორბერტ ვარგა და ლიდია მაკარჩუკი ქორწინებას თავიანთ მეგობრებთან და ოჯახის წევრებთან ერთად აღნიშნავდნენ, როცა შემთხვევით პირველი მსოფლიო ომისდროინდელი ჭურვი გაააქტიურეს.

წყვილი და კიდევ რამდენიმე სტუმარი, მათ შორის, ორი ბავშვი, კოცონის გარშემო შეკრებილიყო და ჩაის მიირთმევდა, როცა ჭურვი აფეთქდა. როგორც ცნობილი გახდა, შემთხვევის შედეგად ახალდაქორწინებული ქალი მძიმედ დაშავდა, მისი ძმა და კიდევ ერთი ადამიანი კი დაიღუპნენ.

"გასათბობად ცეცხლი იმ ადგილას დაანთეს, სადაც წინათ სხვა დაბანაკებულებსაც გაუჩაღებიათ კოცონი", — წერია დაზარალებულთა დასახმარებლად GoFundMe-ზე შექმნილ გვერდზე, — "ამ დროს, მოულოდნელად, ცეცხლის ქვეშ მიწამ იფეთქა".

მაკარჩუკი იხსენებს, რომ კოცონის გარშემო შეკრებილებისთვის თავის ქმართან შეხვედრის ისტორიას ჰყვებოდა, როცა ჭურვი აფეთქდა.

"წამით ვიგრძენი, თითქოს ვიღაცამ ქვა აიღო და სახეში, უფრო ზუსტად კი ცხვირში მესროლაო", — ამბობს მაკარჩუკი, — "ყურში წუილი გაისმა, შემდეგ კი ყველაფერი ისე დადუმდა, რომ მხოლოდ ჩემი ხმის გაგონებაღა თუ შემეძლო. გადავბრუნდი, სახეზე ხელები ავიფარე და ლოცვა დავიწყე. მერე მივხვდი, რომ მხოლოდ მე არ ვიყავი ასე. ყველა კვნესოდა, ყველას სტკიოდა".

მისი თქმით, ძმის ხვნეშაც მოესმა და ნანობს, რომ არ უთხრა, როგორ უყვარდა.

ვარგა, რომელიც ფოტოგრაფია, შემთხვევას სასწაულებრივად გადაურჩა. იგი ფოტოკამერის ასაღებად კარავში ბრუნდებოდა, როცა აფეთქების ხმა გაიგონა.

"ომზე გადაღებული ფილმები ყველაზე ახლოსაა იმასთან, რაც იმ ღამეს გადავიტანე, არასდროს დამავიწყდება", — დასძენს იგი.

ფოტო: GoFundMe

თავდაპირველად უცნობი იყო, რამ გამოიწვია უბედური შემთხვევა, თუმცა, მოგვიანებით ცნობილი გახდა, რომ მიზეზი პირველი მსოფლიო ომისდროინდელი აუფეთქებელი ჭურვი იყო.

ვარაუდობენ, რომ ჭურვი 1916 წლით თარიღდება, როცა რუსეთის მხრიდან ავსტრია-უნგრეთის წინააღმდეგ ეგრეთ წოდებული ბრუსილოვის თავდასხმა განხორციელდა.

მაკარჩუკი კი მკურნალობას განაგრძობს. GoFundMe-ის გვერდზე წყვილის დასახმარებლად ამჟამად $35 ათასზე მეტია შეგროვებული.