ბათუმში მაშველების დასახმარებლად სხვა მოქალაქეებიც გაერთიანდნენ და მათ ადგილზე საკვები პროდუქტები მიაქვთ.

ერთ-ერთი ორგანიზატორის განცხადებით, ამ ეტაპზე 5 000 ლარამდე შეგროვდა და 450 ლარის საკვები, წვენი, ტკბილეული, სიგარეტი იყიდეს. მისივე თქმით, ჩარიცხვები ამ დრომდე გრძელდება.

"ცნობისთვის, მერია, სამინისტრო, როგორც მითხრეს, ასევე, კომპანიები, ფიზიკური პირები ზრუნავენ და მოაქვთ პროდუქტები.

ერთობის ხალხი ვართ!", — წერს ის ფეისბუქგვერდზე.

ორგანიზატორი, ასევე, ამბობს, რომ აპირებენ დარჩენილი თანხით ხვალ დაზარალებულ ოჯახებს დაეხმარონ.

მსურველებს თანხის გადარიცხვა შემდეგ ანგარიშის ნომრებზე შეუძლიათ:

ციალა ქათამიძე — GE38BG0000000162685131

მალხაზ ჭკადუა — GE65TB7274345061600001

გაიგე მეტი:

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. მაშველები 12 საათზე მეტია ცდილობენ ნანგრევების ქვეშ მოყოლილი ადამიანების ამოყვანას. ამ დროისთვის გამოყვანილია ორი ადამიანი, ორივე მათგანი ცოცხალია. ცნობილია, რომ ქალის მდგომარეობა უკიდურესად მძიმეა, კაცის ჯანმრთელობის შესახებ ინფორმაციის დაზუსტებას On.ge ამ წუთებშიც ცდილობს. გარდა ამისა, დღის განმავლობაში ნანგრევების ქვეშ მოყოლილი მანქანიდან ამოიყვანეს წლის და 3 თვის ბავშვი. ის საავადმყოფოდან უკვე გაწერეს.

მსხვერპლის შესახებ ინფორმაცია, ჯერჯერობით, არ ვრცელდება. ამ დრომდე უცნობია ნგრევის მიზეზი. შს მინისტრის თქმით, შესაძლოა, ეს ქვედა სართულზე მიმდინარე სამუშაოები იყოს, რომელსაც მესაკუთრეები აკეთებდნენ. თუმცა გომელაური დაძენს, რომ ჯერ გამოძიება მიმდინარეობს და ზუსტი ინფორმაცია არ აქვთ.

გამოძიება სისხლის სამართლის კოდექსის 240-ე მუხლით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.