თუ დევიდ ფინჩერის ფილმი Zodiac გინახავთ, აშშ-ს ერთ-ერთი ყველაზე ცნობილი და ამოუხსნელი სერიული მკვლელის შესახებ აუცილებლად გეცოდინებათ. "ზოდიაქო" 60-იანი წლებიდან სან-ფრანცისკოს სანაპირო ზოლზე ხალხს ატერორებდა, პოლიციას კი თავისი უცნაური შიფრებითა და წერილებით უბნევდა თავგზას.

ცოტა ხნის წინ დამოუკიდებელმა საგამოძიებო ჯგუფმა, სახელად The Case Breakers, რომელიც პოლიციის 40 ყოფილი გამომძიებლისგან შედგება, განაცხადა, რომ "ზოდიაქოს" მკვლელის ვინაობა დაადგინეს. მათი თქმით, ეს ახლადმოპოვებული საგამოძიებო ექსპერტიზის მტკიცებულებებით, ნივთიერი მტკიცებულებებითა და თვითმხილველთა ჩვენებებით შეძლეს.

გამომძიებელთა ჯგუფი თვლის, რომ "ზოდიაქო" კაცი, სახელად გერი ფრანცის პოუსტია, რომელიც 2018 წელს გარდაიცვალა. ჯგუფმა მისი ფირების გასამჟღავნებელი ოთახიდან მტკიცებულების სახით ფოტოებიც წარმოადგინა.

გამოცემა CNN გამომძიებელთა ჯგუფის განცხადების შემდეგ სან-ფრანცისკოს პოლიციასა და FBI-ის დაუკავშირდა. ისინი ჯგუფის განცხადებას არ ადასტურებენ და ამბობენ, რომ საქმე ჯერჯერობით გახსნილი არაა და საზოგადოებისთვის ახალი ინფორმაცია არ აქვთ.

"ზოდიაქომ" 1968 და 1969 წლებში ჩრდილოეთ კალიფორნიაში 5 ადამიანი მოკლა, პარალელურად კი პოლიციასა და გაზეთებს დამცინავ წერილებსა და კრიპტოგრამებს უგზავნიდა. იდუმალ მკვლელს "ზოდიაქო" იმის გამო შეერქვა, რომ მისი კრიპტოგრამები ასტროლოგიურ სიმბოლოებსა და მინიშნებებსაც შეიცავდა.

რა თქმა უნდა, ეს პირველი შემთხვევა არაა, როდესაც ადამიანები "ზოდიაქოსთან" დაკავშირებული საიდუმლოებების ამოხსნას ცდიან. აღსანიშნავია, რომ 2020 წელს "ზოდიაქოს" მიერ შედგენილი და წლების განმავლობაში ამოუხსნელი წერილი ავსტრალიელმა კომპიუტერულმა ინჟინერმა სემ ბლეიკმა, ამერიკელმა კრიპტოგრაფმა დევიდ ორანჩაკმა და ბელგიელმა კომპიუტერულმა ინჟინერმა იარლ ვანმა გაშიფრეს.

"ზოდიაქოსთან" დაკავშირებულ განცხადებას, რა თქმა უნდა, რეაქციები ტვიტერზეც მოყვა:

"ამ კვირის მოვლენების შემდეგ დევიდ ფინჩერს The Social Network-ისა და Zodiac-ის სიქველების გადაღება მოუწევს"

"რა სიგიჟეა იმის წარმოდგენა, რომ ნამდვილი "ზოდიაქო" შეიძლება 2007 წელს კინოთეატრში Zodiac-ის სანახავად წავიდა"

როგორ განვითარდება "ზოდიაქოსთან" დაკავშირებული მოვლენები, ჯერჯერობით უცნობია. ვინ იცის, იქნებ წლების შემდეგ საიდუმლოს ნათელი მართლაც მოეფინოს და ამის შესახებ დევიდ ფინჩერმა კიდევ ერთი გენიალური ფილმიც გადაიღოს.

ამავე თემაზე: