გირჩის ერთ-ერთი ლიდერის, იაგო ხვიჩიას განცხადებით, მას სჯერა, რომ მიხეილ სააკაშვილი საქართველოში მმართველმა გუნდმა ჩამოიყვანა, აუფრიალა თვალწინ საქართველოს მოსახლეობას და ამით წაიღო არჩევნები ქართულმა ოცნებამ და ნაციონალურმა მოძრაობამ.

"მოგილოცავთ ამ შესანიშნავ გაამრჯვებას ორ გამარჯვებულ პარტიას, ქართულ ოცნებასა და ნაციონალურ მოძრაობას და გილოცავთ იმას, რომ ამჯერად იმუშავა კიდევ ერთხელ თქვენმა ტრიუკმა, რომელმაც, როგორც აგერ ბატონი ირაკლი საუბრობს მე-8 არჩევნები მოგაგებინათ, მინდა დავაფიქსირო ჩემი პოზიცია, ზოგადად, როგორ ვუყურებ პროცესს, რომელიც ამ ქვეყანაში ვითარდება. ბევრი სხვადასხვა ადამიანი ამას გაიმეორებს მომავალში და მინდა, რომ ამ ტრიბუნიდან იყოს ნათქვამი.

მე ვმოძრაობ რწმენით, რომ მიხეილ სააკაშვილი თქვენ ჩამოიყვანეთ, აუფრიალეთ თვალწინ საქართველოს მოსახლეობას. ამით წაიღეთ არჩევნები თქვენ და ნაციონალურმა მოძრაობამ ურთიერთშეთანხმებით", — განაცხადა მან პარლამენტში.

ხვიჩიას თქმით, ამ "ტრიუკმა" ამჯერად იმუშავა, თუმცა ის რჩევას აძლევს, ქართულ ოცნებას, რომ ამის გამოყენება უკვე სარისკოა და მომავალში არავინ იცის, დაიჯერებს თუ არა ხალხი იმას, რომ მიხეილ სააკაშვილი და ნაციონალური მოძრაობა მმართველ გუნდს ებრძვის.

"ახლა ზის მიხეილ სააკაშვილი ცოტა ხანი ციხეში და მერე უკრაინაში ან სადმე გაადეპორტებთ ან რამე მსგავსს მოიფიქრებთ. ამ ტრიუკმა ამჯერად იმუშავა, მე მინდა, რომ მოგილოცოთ, მაგრამ ასევე, რჩევას მოგცემდით, რომ უკვე სარისკოა ამ ტრიუკის გამოყენება და დაანებეთ მიხეილ სააკაშვილს თავი, მომავალში კაცმა არ იცის დაგიჯერებენ თუ არა იმას, რომ მიხეილ სააკაშილი თქვენ გებრძვით და ნაციონალური მოძრაობა თქვენ გებრძვით.

აქედან გამომდინარე, დროა უკვე იფიქროთ თქვენს 2012 წლის დაპირებაზე, რომ ნაციონალური მოძრაობა საერთოდ არ იქნებოდა აქტუალური პოლიტიკური ძალა ნაცვლად იმისა, რაც გააკეთეთ 2012 წლის შემდეგ, 9 წლის თავზე ზუსტად იგივე მდგომარეობაა, რის გამოც მოხვედით და რა საფრთხის ასარიდებლადაც მოგიყვანათ ქართველმა ხალხმა", — განაცხადა დეპუტატმა.

მისივე თქმით, არ იცის, თუ რამდენად არის ეს მოსალოცი მათთვის, ან ქართველი ხალხისთვის.

"ასე ვუყურებ ამ არჩევნებს, არ ვიცი რამდენად არის ეს საზეიმო და მოსალოცი თქვენთვის, რამდენად არის მოსალოცი ქართველი ხალხისთვის, მაგრამ ჩემი აზრით, იმსახურებს ქართველი ხალხი იმას, რომ კიდევ 3 წლის განმავლობაში ეს გენიალური დუეტი ქართული ოცნებისა და ნაციონალური მოძრაობის სახით, ჰყავდეს და უყუროს ამ მრავალფეროვნებას, რომელსაც თქვენ სთავაზობთ ნაციონალურ მოძრაობასთან ერთად.

მადლობა ყურადღებისთვის და კიდევ ერთხელ გილოცავთ ამ ბრწყინვალე გამარჯვებას ქართველ ხალხზე", — აცხადებს ხვიჩია.

ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება. მეორე ტური ჩატარდება თბილისშიც.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.