ქართული ოცნების თავმჯდომარის, ირაკლი კობახიძის განცხადებით, ექსპრემიერმინისტრთან და მათი გუნდის ყოფილ წევრთან, გიორგი გახარიასთან თანამშრომლობა გამორიცხულია. ამის შესახებ მან პარტიაში გამართულ ბრიფინგზე ისაუბრა.

"გახარიას პარტიასთან, მოღალატის პარტიასთან, რა თქმა უნდა, გამორიცხულია თანამშრომლობა. რაც შეეხება მის პოლიტიკურ პარტიას, ის აუცილებლად დაიშლება და მოიშლება, ერთი მარტივი იზეზის გამო. ჩვენ ვაანონსებდით, რომ არჩევნების შემდეგ ეს ადამიანი დაემალებოდა საზოგადოებას და თქვენ იცით, რომ მეორე დღეა უკვე არჩევნების დასრულების და ის უბრალოდ არ ჩანს. ელემენტარული მადლობაც კი არ უთხრა იმ ასი ათას ადამიანს, ვინც მის პარტიას დაუჭირა მხარი, ბოლივით აორთქლდა ეს ადამიანი. რაც მეტყველებს, რომ მან ყველაზე კარგად იცის, რომ ის არის მოღალატე და შესაბამისად, პირველ რიგში თავის თავს ემალება ამ არგამოჩენით [...] კონკრეტულ საკრებულოს წევრებთან ვიმუშავებთ", — განაცხადა მან.

ცენტრალური საარჩევნო კომისიის წინასწარი მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება. მანამდე, 2 ოქტობერს, ეგზიტპოლების შედეგების შემდეგ, მმართველმა პარტიამ ოფისთან საგანგებოდ მოწყობილ სცენაზე იზეიმა. იმედის დაკვეთით ჩატარებული GORBI-ის კვლევის მიხედვით, ქართულ ოცნებას 47%-ზე მეტი უნდა აეღო, ხოლო თბილისში მეორე ტური არ ინიშნებოდა.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.