ქართული ოცნების თავმჯდომარე ირაკლი კობახიძე აცხადებს, რომ მისი ყოფილი თანაგუნდელი, თბილისის მერობის კანდიდატი, გიორგი გახარია აორთქლდა. კობახიძე აღნიშნავს, რომ გახარიამ მადლობაც კი არ გადაუხადა იმ ადამიანებს, რომლებმაც ხმა მისცეს.

"არჩევნების შემდეგ ეს ადამიანი დაემალებოდა საზოგადოებას და თქვენ იცით, რომ მე-2 დღეა არჩევნების დასრულების შემდეგ და ის უბრალოდ არ ჩანს. ელემენტარული მადლობაც კი არ უთხრა იმ 100 000 ადამიანს, რომელმაც მის პარტიას დაუჭირა მხარი. ბოლივით აორთქლდა ეს ადამიანი. ეს კიდევ მეტყველებს რაზე? მან ყველაზე კარგად იცის, რომ ის არის მოღალატე და შესაბამისად პირველ რიგში თავის თავს ემალება ამ არ გამოჩენით", — ამბობს კობახიძე.

მან ასევე აღნიშნა, რომ გახარიას პარტიასთან ქართული ოცნება თანამშომლობას არ აპირებს.

2 ოქტომბრის არჩევნების შემდეგ, გიორგი გახარიას საჯარო კომენტარი არ გაუკეთებია.

ცენტრალური საარჩევნო კომისიის წინასწარი მონაცემებით, პარტია საქართველოსთვის 7,8% აქვს. თბილისის მერობის არჩევნებზე, წინასწარი მონაცემებით, გიორგი გახარია მესამე ადგილზე გავიდა, მან ხმების 9.35% აიღო.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.