თბილისის მერობის კანდიდატის, კახა კალაძის განცხადებით, გაუხარდებოდა, პირველივე ტურში რომ მოეგო და ამის მოლოდინი ჰქონდა კიდეც. თუმცა, მისივე თქმით, მზად არის რომ მეორე ტურში მონაწილეობა მიიღოს.

კალაძემ აღნიშნა ისიც, რომ შეიძლება, რამე დააკლო საარჩევნო პროცესს და ბოდიშიც მოიხადა. მისივე შეფასებით, ქართული ოცნება დამაჯერებლად იგებს არჩევნებს.

"კახა კალაძემ აიღო 45%, მეორე ადგილზე გამსვლელმა — 34%. რომელია მეტი, 45 თუ 34? რა თქმა უნდა, დამაჯერებელი გამარჯვებაა. მე გამიხარდებოდა, რომ პირველ ტურში დაგვემთავრებინა არჩევნები, ამისთვის ყველაფერი გავაკეთეთ. შეიძლება რაღაცა დავაკელით, რაღაცა მეც შეიძლება გამომრჩა და ამისთვის ბოდიში, თუმცა კიდევ ერთხელ ვიმეორებ, ერთადერთი პოლიტიკური პარტია არის ქართული ოცნება, ვინც დამაჯერებლად გაიმარჯვა, მიიღო 48%", — თქვა კალაძემ.

დღეს, 3 ოქტომბერს ქართული ოცნების თავმჯდომარის, ირაკლი კობახიძის განცხადებით, საქართველოში თვითმმართველობის არჩევნების მეორე ტური 30 ოქტომბერს გაიმართება.

ცესკომ პირველადი მონაცემები უკვე გამოაქვეყნა, რომელთა მიხედვითაც, თბილისში მეორე ტური ჩატარდება. მანამდე, 2 ოქტობერს, ეგზიტპოლების შედეგების შემდეგ, მმართველმა პარტიამ ოფისთან საგანგებოდ მოწყობილ სცენაზე იზეიმა. იმედის დაკვეთით ჩატარებული GORBI-ის კვლევის მიხედვით, ქართულ ოცნებას 47%-ზე მეტი უნდა აეღო, ხოლო თბილისში მეორე ტური არ ინიშნებოდა.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.