ადამიანის უფლებათა ცენტრი აცხადებს, რომ ადგილობრივი თვითმმართველობის არჩევნებზე კოორდინატორებისა და აგიტატორების აქტიურობა კვლავ დიდი პრობლემა იყო. არასამთავრობო ორგანიზაციაში, ასევე, აღნიშნავენ, რომ განსაკუთრებით მმართველი პარტიის წარმომადგენლები იკრიბებოდნენ. მათივე თქმით, ისინი აღრიცხავდნენ ამომრჩევლებს, ესაუბრებოდნენ მათ, თავისუფალი ნების გამოხატვაზე გარკვეულ ზეწოლას ახდენდნენ, ცდილობდნენ რომ ამომრჩევლებს კაბინაში შეყოლოდნენ თითქოსდა დასახმარებლად.

"კვლავ დიდი პრობლემა იყო საარჩევნო ოლქების მიმდებარე ტერიტორიაზე პარტიების, ძირითადად, მმართველი პარტიის ე.წ. კოორდინატორებისა და აგიტატორების აქტიურობა, მიუხედავად იმისა, რომ კოდექსში შევიდა ცვლილება და გაიზარდა მანძილი. ამ დროს საარჩევნო კომისიის თავმჯდომარეები არ ურეკავდნენ პოლიციას, რაც მათ მოვალებაში შედის", — აცხადებენ ადამიანის უფლებათა ცენტრში.

ასევე, მარნეულის 22-ე საარჩევნო უბნის 48-ე საარჩევნო უბანში, ადამიანის უფლებათა ცენტრმა არჩევნების შედეგების გაბათილება მოითხოვა.

20:00 საათზე სამი სხვადასხვა ეგზიტპოლის შედეგები გამოქვეყნდა, რომლებიც ერთმანეთისგან განსხვავებულ მონაცემებს აჩვენებს. კერძოდ, Edison Research და IPSOS ამბობს, რომ თბილისში მეორე ტური იქნება, ხოლო GORBI-ის ეგზიტპოლის მიხედვით კახა კალაძეს 51,3%-იანი მხარდაჭერა აქვს.