ლელოს ერთ-ერთი ლიდერის, ანა ნაცვლიშვილის განცხადებით, მათ საგარეჯოს ერთ-ერთ უბანთან სავარაუდო მოსყიდვის შემთხვევა დააფიქსირეს. ამის შესახებ მან სპეციალურ ბრიფინგზე ისაუბრა და კადრები წარადგინა.

"ჩვენ დავაფიქსირეთ კონკრეტული ფულის გადაცემის ფაქტი, რაც არის უმძიმესი დარღვევა, რომელსაც ადგილი ჰქონდა საგარეჯოს მე-6 უბანთან. მთელი დღის განმავლობაში ჩვენთან შემოვიდა ათეულობით ინფორმაცია სავარაუდო მოსყიდვის შესახებ და ამაზე რეაგირება არ არის სამართალდამცავი ორგანოების მხრიდან და ახლა ჩვენ გვაქვს მტკიცებულება, რომელიც ადასტურებს ფულის გადაცემის ფაქტს უბანთან. ამასთან დაკავშირებით სასწრაფოდ მოვითხოვთ გამოძების დაწყებას და უსწრაფეს რეაგირებას", — განაცხადა მან.

ნაცვლიშვილის თქმითვე, მათ აქვთ ეჭვი, რომ კორონავირუსთან დაკავშირებით შექმნილი გადასატანი ყუთების "სქემა მუშაობს". როგორც მან აღნიშნა, "ეს სიები გაბერილია".

"ჩვენ გვაქვს არაერთი შემთხვევა სამეგრელოში და უკვე ნაძალადევში, როცა ადამიანი გადასატანი ყუთის სიაში არის, მიდის უბანზე, იმიტომ, რომ თავად არანაირი პრობლემა არ აქვს და აღმოაჩენს, რომ მის მაგივრად ვიღაცამ გადასატანი ყუთის მეშვეობით მისცა ხმა", — თქვა მან.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.