ფოთში და ხობის სოფელ შავღელეში ძლიერმა ქარმა საცხოვრებელ სახლებს სახურავები გადახადა, წაქცეულია ხეები, დაზიანებულია სავარგულები, მოსახლეობის ნაწილს კი ელექტროენერგიის მიწოდება შეზღუდული აქვს. ინფორმაციას ადგილობრივი მუნიციპალიტეტები ავრცელებენ.

"მიმდინარეობს სახლების გადახურვა დროებითი გადასახური მასალით. სტიქიით მიყენებულ ზარალს სპეციალური კომისია სწავლობს, რომლის შემდეგ დაზარალებულ ოჯახებს შესაბამისი დახმარება გაეწევა", — აცხადებენ ფოთის მერიაში.

ინფორმაციის თანახმად, სტიქიის ადგილზე ორივე ქალაქში მერიის შესაბამისი სამსახურები არიან მობილიზებულები, სოფელ შავღელეში კი ადგილზე საგანგებო სიტუაციების მართვის სამსახური და ენერგო პრო-ჯორჯიას ჯგუფები იმყოფებიან. მათივე ცნობით, დაზარალებულების ოჯახები ხელისუფლებისგან დახმარებას მიიღებენ.