მეგის ქარდავას ადვოკატის განცხადებით, დაკავებული ბრალს არ აღიარებს და განაჩენის გასაჩივრებას აპირებს. ადვოკატი ამბობს, რომ ექსტრადიციისას დაირღვა პროცედურები და ამაზე ქარდავა დეტალურად მოგვიანებით ისაუბრებს.

"განაჩენი ყველა გასაჩივრდება სათანადოდ, იმ ვადაში, რაც კანონით არის დადგენილი. მისი პოზიცია კვლავაც უცვლელია, ის არ აღიარებს არც ერთ ბრალდებას. ხოლო მის დამოკიდებულებას ექსტრადირებაზე, როგორ იყო, რა დარღვევებით, ერთიან განცხადებას გააკეთებს მისივე სოციალური ქსელის მეშვეობით", — ამბობს ადვოკატი.

ექსტრადირებას კი ის წინასაარჩევნო შეთანხმებას უკავშირებს. მისი მტკიცებით, ქარდავა უკრაინელი მოქალაქეების გათავისუფლების სანაცვლოდ გადმოსცეს ქართულ მხარეს.

ქარდავას უკრაინაში დაკავების შესახებ ინფორმაცია 2017 წელს გავრცელდა. იქამდე, ის ინტერპოლით წითელი ცირკულარით იძებნებოდა. სამხედრო პოლიციის ყოფილი ხელმძღვანელის მიმართ საქართველოში არსებული 11 სისხლის სამართლის საქმიდან ხუთზე გამამტყუნებელი განაჩენია გამოტანილი, ხოლოდ 6 სისხლის სამართლის საქმე თბილისის საქალაქო სასამართლოში იხილება.

სააპელაციომ საქალაქო სასამართლოს გადაწყვეტილება, რომელმაც სერგო თეთრაძის წამების საქმეზე ქარდავა გაამართლა, შეცვალა და ყოფილ მაღალჩინოსანს პატიმრობა მიუსაჯა. მას დაუსწრებლად ცხრა წლით თავისუფლების აღკვეთა აქვს შეფარდებული. სასამართლოს გადაწყვეტილებით, ის დამნაშავედ სცნეს 144-ე და 138-ე მუხლებით, რაც სექსუალური ხასიათის ძალმომრეობასა და წამებას გულისხმობს.

მეგის ქარდავა საქართველოში 17 სექტემბერს ჩამოიყვანეს.