პარტია საქართველოსთვის ლიდერი, გიორგი გახარია აცხადებს, რომ დღეს სასულიერო პირებს სახელმწიფო პოლიტიკური მიზნით იყენებს. აღნიშნულით გახარიამ მეუფე იაკობის მიერ გაკეთებულ განცხადებას უპასუხა.

"ეს არ ხდება პირველად. მეუფემ ეს სამწუხაროდ ადრეც გააკეთა. ჩემთვის ამ ყველაფრის უკან, ყველაზე ტრაგიკული ისაა, რომ სამწუხაროდ, დღეს სასულიერო პირებს სახელმწიფო იყენებს პოლიტიკური მიზნით. პოლიტიკურმა პარტიამ ფაქტობრივად მთლიანად სახელმწიფო ინსტიტუტები მოირგო და მათ რესურს იყენებს იმისთვის, რომ ძალაუფლება შეინარჩუნოს, ახლა უკვე გადავიდა ეკლესიაზე", — თქვა გახარიამ.

მისივე განცხადებით, არ აპირებს მეუფე იაკობის სიტყვები შეაფასოს, თუმცა ხედავს, რომ ეკლესიის აბსოლუტურად ჩართვას ცდილობენ პოლიტიკურ პროცესში.

"ბოლო თვეების განმავლობაში რამდენიმე შემთხვევა იყო, როდესაც სახელმწიფომ ძალიან უხეშად, უპასუხისმგებლოდ გამოიყენა ეკლესია, მისი სახელი, გამოიყენა სასულიერო პირები - შემდგომ მათ ამოეფარა ზურგსუკან და დაიმალა. იგივე ხდება ახლაც. პოლიტიკური მიზნის მისაღწევად კონკრეტული პირები და კონკრეტული პოლიტიკური პარტია დღეს იყენებს ეკლესიას .ეს სწორედ ეს შემთხვევაა. და მე არ მივცემ ჩემს თავს იმის უფლებას, რომ მეუფის სიტყვები რაღაცნაირად შევაფასო. არ მაინტერესებს. ყველაზე ცუდს რასაც ვხედავ — ეკლესიის აბსოლუტურად ჩართვას ცდილობენ პოლიტიკურ პროცესში. არ მივცემ მე ამას შეფასებას", — აცხადებს ის.

ბოდბელმა ეპისკოპოსმა იაკობმა განაცხადა, რომ ექსპრემიერი გიორგი გახარია პრემიერმინისტრობის დროს შინაგან საქმეთა სამინისტროს მაღალი თანამდებობების პირებს სასულიერო პირებზე, ეპისკოპოსებსა და მღვდლებზე კომპრომატების შეგროვებას ავალებდა.