ჭიათურის მულტიფუნქციურ ცენტრში პირველი სასწავლო სემესტრი დაიწყო. ოფიციალური ღონისძიება ტრესტის ყოფილ შენობაში გაიმართა.

მულტიფუნქციური ცენტრი იმერეთის პროფესიულ საგანმანათლებლო ჰაბს აერთიანებს, რომელიც ადგილობრივებს აქტიურად ჩართავს საზოგადოებრივ ცხოვრებაში და დაეხმარება შრომით ბაზარზე ეფექტურ ინტეგრაციაში.

ღონისძიებას, რომელიც კოვიდრეგულაციების დაცვით გაიმართა, ოფიციალური პირები დაესწრნენ: კომპანია ჯორჯიან მანგანეზის სპეციალური მმართველი ნიკოლოზ ჩიქოვანი, იმერეთის სახელმწიფო რწმუნებული ზვიად შალამბერიძე, მაჟორიტარი დეპუტატი პაატა კვიჟინაძე და პარტნიორი ორგანიზაციების წარმომადგენლები.

დამსწრეებს დეტალურად მიეწოდათ ინფორმაცია ჭიათურის მულტიფუნქციური ცენტრის საქმიანობის შესახებ, უკვე განხორცილებულ და დაგეგმილ პროექტებთან დაკავშირებით. ამავე დღეს, ჭიათურის მულტიფუნქციურ ცენტრსა და ახალგაზრდობის სააგენტოს შორის ურთიერთთანამშრომლობის მემორანდუმი გაფორმდა. მისი მიზანი რეგიონში ახალგაზრდული პოლიტიკის შექმნა და გაძლიერებაა.

ფოტო: ჯორჯიან მანგანეზი

როგორც მულტიფუნქციურ ცენტრში აცხადებენ, ისინი ამბიციური გეგმით განაგრძობენ საქმიანობას. ორგანიზაციამ რეგიონის მასშტაბით უკვე შეძლო ახალგაზრდების დაინტერესება სხვადასხვა სასწავლო პროგრამით. მათ საშუალება აქვთ, აირჩიონ სასურველი პროგრამა, ჩაირიცხონ გადამზადების კურსზე, მიიღონ ცოდნა ან აიმაღლონ კვლიფიკაცია.

ფოტო: ჯორჯიან მანგანეზი

ცენტრში სწავლა უფასოა, რადგან მას ფინანსური მხარდაჭერით კომპანია ჯორჯიან მანგანეზი უზრუნველყოფს, რომელიც ორგანიზაციის მთავარი დონორიცაა.

პროფესიული მომზადება-გადამზადების კურსები კი მრავალფეროვანია:

  • Web Development
  • Front End Development
  • Backend Development
  • Different Coding Languages
  • UI/UX Design
  • Graphic Design

მულტიფუნქციურ ცენტრში ასევე გაიხსნა რობოტიკის სკოლა. ამასთან, სოფლის მეურნეობის სფეროს რამდენიმე მიმართულებითაც შეიქმნა სასწავლო კურსები: მეხილეობა, მეფუტკრეობა, დეკორატიული მცენარეების გამოყვანა და წარმოება.

სხვადასხვა პროფესიული მომზადება-გადამზადების კურსები ჯამში ორასზე მეტ ბენეფიციარს აერთიანებს. მულტიფუნქციური ცენტრი უახლოეს პერიოდში დაინტერესებულ ახალგაზრდებს დამატებით ახალ პროგრამებსაც შესთავაზებს.

ჯორჯიან მანგანეზის გადაწყვეტილებით კი, მულტიფუნქციურ ცენტრს ეგრეთ წოდებული ტრესტის ყოფილი შენობა გადაეცა, რომელიც თითქმის ასწლიან ისტორიას ითვლის. შენობას ძეგლის სტატუსი აქვს მინიჭებული და მისი რეაბილიტაცია სტანდარტების დაცვით განხორციელდება.