საერთაშორისო გამჭირვალობა საქართველოს (TI) ინფორმაციით, მესტიის მერიის შესყიდვების სამსახურის უფროსის, მარიამ ნაკანის და თამარ ნაკანი, დედა ლამარა გულბანი და ქმარი თეიმურაზ გულედანი ადგილობრივ შესყიდვებში არიან ჩართული. მათივე განცხადებით, აღნიშნულ პირებს სახელმწიფო შესყიდვებიდან ჯამში 373 811 ლარის ღირებულების ხელშეკრულებები აქვთ მიღებული.

როგორც TI-ში ამბობენ, ძირითადი ნაწილი — 346 973 ლარის ღირებულების კონტრაქტები თეიმურაზ გულედანის მიერ 2017 წლიდან დღემდე მოგებულ ტენდერებსა და გამარტივებულ შესყიდვებზე მოდის.

ორგანიზაციის ინფორმაციით, თეიმურაზ გულედანი შესყიდვებში ინდივიდუალური მეწარმის სტატუსით მონაწილეობს. მას 7 ტენდერი აქვს მოგებული, ასევე მიიღო 5 გამარტივებული შესყიდვა. 7 ტენდერიდან 3 შემთხვევაში შემსყიდველი მესტიის მერია, ერთხელ კი მესტიის სკოლამდელი აღზრდის დაწესებულებების გაერთიანება იყო, ასევე ხუთი გამარტივებული შესყიდვიდან თითო მესტიის მერიასა და მესტიის დასუფთავების სამსახურს ეკუთვნის.

"თეიმურაზ გულედანმა უშუალოდ მესტიის მერიისა და მისი იურიდიული პირებისგან ჯამურად 275 395 ლარი მიიღო, რაც მის მიერ მიღებული კონტრაქტების საერთო ღირებულების 80% შეადგენს. აღსანიშნავია, რომ გულედანის მიერ მოგებული მესტიის მერიის სამი შესყიდვის შემთხვევაში, სატენდერო კომისიის წევრი იყო მისი მეუღლე, თუმცა მარიამ ნაკანის ხელმოწერა სატენდერო კომისიის სხდომის ოქმებზე არ ფიქსირდება"— ვკითხულობთ TI-ს განცხადებაში.

რაც შეეხება მარიამ ნაკანის დედას, ლამარა გულბანს, ორგანიზაციის ინფორმაციით, მან 2013-2018 წლებში 12 513 ლარის ღირებულების 13 გამარტივებული შესყიდვა მიიღო —მათ შორის 8 817 ლარის ღირებულების 7 გამარტივებული შესყიდვა მესტიის მუნიციპალიტეტისაგან.

მათივე თქმით, თამარ ნაკანმა 2016 წლიდან დღემდე 14 325 ლარის ღირებულების 5 გამარტივებული შესყიდვა მიიღო — 3 შემთხვევაში შემსყიდველი მესტიის მერია, ორჯერ კი მესტიის მუნიციპალიტეტის სკოლისგარეშე სახელოვნებო-საგანმანათლებლო სკოლა იყო.