ერთიანი ნაციონალური მოძრაობის ერთ-ერთი ლიდერის, ხატია დეკანოიძის განცხადებით, ქუთაისში ერთ-ერთი საარჩევნო უბანზე გადასატან ყუთზე ქართული ოცნების კოორდინატორია მიმაგრებული. ამის შესახებ მან სპეციალურ ბრიფინგზე ისაუბრა და ცენტრალურ საარჩევნო კომისიას რეაგირებისკენ მოუწოდა.

"ქუთაისში საარჩევნო კომისიის ერთ-ერთ წევრს 43-ე უბანში ჩვენს წარმომადგენელთან წამოსცდა, ჩვენ ამის მასალა გვაქვს და მოგაწოდებთ აუცილებლად, რომ გადასატან ყუთზე 43-ე უბანზე მიმაგრებულია ქართული ოცნების ადგილობრივი პარტიის კოორდინატორი ვინმე ქალბატონი ციცო, წამოსცდა", — ამბობს დეკანოიძე.

დეკნოიძემ სხვა დარღვევებზეც ისაუბრა და განაცხადა, რომ ქუთაისში რამდენიმე უბანი დაკეტილა და საუბნო საარჩევნო კომისიები არ მუშაობს. მისივე თქმით, გაკრულია სიები, სადაც ადამიანებს არ შეუძლიათ, საკუთარი სახელი და გვარი ან მისამართი ამოიცნონ.

"სიები, განსაკუთრებით, იმ რაიონებში, რომლებიც წინა არჩევნებზე დიდი უპირატესობით იყო მოგებული ოპოზიციის მიერ, გამოკრულია საარჩევნო კომისიებიდან რამდენიმე კილომეტრის იქეთ, ესეთი არის რამდენიმე უბანი. ყველაზე მნიშვნელოვანი არის ის, რომ მაგალითად 70-ე უბანზე, რომელიც ქუთაისში კილომეტრ-ნახევარშია, სია გამოკრულია იმისთვის, რომ ადამიანები დაიბნენ და ვერ აღმოაჩინონ საკუთარი თავი, ვერ იპოვონ და ვერ მივიდნენ საარჩევნო უბნამდე, ეს არის ძალიან მნიშვნელოვანი დარღვევა", — განაცხადა დეკანოიძემ.

On.ge დაუკავშირდა ცენტრალურ საარჩევნო კომისიასაც. მათ პასუხს მიღებისთანავე შემოგთავაზებთ.

საქართველოში თვითმმართველობის არჩევნები 2 ოქტომბერს იქნება. მას ოპოზიცია რეფერენდუმს უწოდებს და აცხადებს, რომ თუ ქართული ოცნება 43%-ს ვერ აიღებს, რიგგარეშე არჩევნები ჩატარდება. აღნიშნულს არ ეთანხმება მმართველი პარტია, რომელიც 28 ივლისს შეთანხმებიდან გავიდა და დოკუმენტი ანულირებულად გამოაცხადა. პარტიის თავმჯდომარემ, ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

მიშელის შეთანხმების ერთ-ერთი მთავარი ჩანაწერი კი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.