გირჩი — მეტი თავისუფლებისთვის ლიდერის, ზურაბ ჯაფარიძის თქმით, ქართულმა ოცნებამ შარლ მიშელის დოკუმენტზე უარის თქმით მოკავშირედ რუსეთი აირჩია. ჯაფარიძის შეფასებით, ხელისუფლების მიერ მართლმსაჯულების სისტემის რეფორმაზე უარის თქმა, რომლის უკანაც ამერიკა და ევროკავშირი იდგა, ქვეყნის ცივილიზაციურ არჩევანზე უარის თქმას ნიშნავს.

"თუ დასავლურ კურსზე ამ ქვეყანაში რომელიმე მთავრობა ამბობს უარს, მისი ბუნებრივი მოკავშირე ხდება რუსეთი, მიუხედავად იმისა, რისი შეიძლება გვჯეროდეს, რისი შეიძლება არ გვჯეროდეს, ეს ხდება ბუნებრივად. ეს არის საფრთხე რომლის წინაშეც ახლა ვდგავართ, ძალიან რეალური საფრთხე. ამ საფრთხეს ემატება ის რომ დასავლეთში, ამერიკაშიც და ბრიუსელშიც, ევროკავშირშიც, დაიღალნენ უკვე ჩვენი პრობლემებით", — თქვა ჯაფარიძემ ქუთაისის საკრებულოს მაჟორიტარობის კანდიდატების წარდგენაზე.

მისივე თქმით, ამის შეცვლა 2 ოქტომბერს, არჩევნების საშუალებით შეიძლება, "რომელიც რეფერენდუმად იქცა".

"ეს არის რეალობა, ამ საფრთხის წინაშე ვდგავართ, რომ დასავლეთმა ჩვენზე ხელი ჩაიქნიოს, ეს ხდება 2 ოქტომბერს, 2 ოქტომბერს ეს არის გადასაწყვეტი. მესმის, რომ ეს არის ფორმალურად ადგილობრივი არჩევნები, მაგრამ საბოლოო ჯამში, ეს არჩევნები ბუნებრივად იქცა რეფერენდუმად, საით წავა ეს ქვეყანა".

ქართულმა ოცნებამ 28 ივლისს განაცხადა, რომ ოპოზიციასთან ევროკავშირის მედიაციითა და შარლ მიშელის პირადი ჩართულობით მიღწეული შეთანხმება ანულირებულია. პარტიის თავმჯდომარემ, ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

შარლ მიშელის შეთანხმების ერთ-ერთი მთავარი ჩანაწერი 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.