დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, ქუჩებში აცრის ბილბორდები არასაკმარისია, ამიტომ თითოეულ ადამიანს, ვინც წინასაარჩევნო ბანერებზეა გამოსახული, სთხოვს, რომ ბანერები აცრისკენ მოწოდებისთვის გამოიყენონ.

"ჩემზე რომ იყოს დამოკიდებული, ყველა იმ ადამიანის ბანერს, რომელიც დღეს გამოკრულია, მივაწერდი, რომ ერთად წავიდეთ და ავიცრათ. ამავე დროს, ყველა იმ ადამიანს, ვინც ბანერზეა გამოხატული, ვთხოვდი, რომ თავისი აცრის სურათი ერთ-ერთ ბანერზე დადონ, რომ აიცრნენ და ხალხს აჩვენონ, რომ დღეს, დიახ, ყველაზე მთავარი გახლავთ აცრა ქვეყანაში. [...] აცრის ბილბორდები არის, მაგრამ გეთანხმებით იმაში, რომ არასაკმარისია", — აღნიშნავს NCDC-ის ხელმძღვანელი.

გამყრელიძის თქმით, წინასაარჩევნო კამპანიის მთავარი სლოგანი აცრისკენ მოწოდება უნდა იყოს. მისი განცხადებით, მეტი ადამიანის აცრა თითოეული კანდიდატის ინტერესში უნდა შედიოდეს.

"დღეს წინასაარჩევნო კამპანიაში ამ ერთი თვის განმავლობაში მთავარი სლოგანი უნდა იყოს, თვითონ გადააკეთონ, როგორც უნდათ, მაგრამ შინაარსობრივად სლოგანი უნდა იყოს, რომ ყველა უნდა ავიცრათ, რომ აცრა გადაარჩენს ათასობით ადამიანის სიცოცხლეს. [...] დღეს თითოეული კანდიდატის, ვინც კენჭს იყრის, სხვადასხვა საკრებულოებში, მერობის კანდიდატები, ისინი უნდა იყვნენ დაინტერესებული, რომ რაც შეიძლება მეტი ადამიანი აიცრას ქვეყანაში.", — აცხადებს გამყრელიძე.

ამასთან, გამყრელიძე ამბობს, რომ პოლიტიკოსებმა წინასაარჩევნო შეხვედრები აცრაზე გზავნილებით უნდა დაიწყონ ან თან ექიმები წაიყვანონ.