პოლიტიკური პარტია ლელოს ლიდერებმა, თბილისის საკრებულოს თავმჯდომარეობის კანდიდატმა ბადრი ჯაფარიძემ, მერობის კანდიდატმა ანა ბიბილაშვილმა და ვაკის მაჟორიტარი დეპუტატობის კანდიდატმა მედეა მეტრეველმა დღეს, ყიფშიძის ქუჩაზე მიმდინარე მშენებლობა მოინახულეს. მათი თქმით, ეს მშენებლობა "ურბანული გენოციდია".

"თბილისი არის ადამიანების და ისინი უნდა გრძნობდნენ თავს კარგად. ის რაც ყიფშიძეზე ხდება, ხდება მთელ თბილისში. ყველა ვთანხმდებით იმაზე, რომ თბილისის განვითარება არ არის ისეთი როგორიც უნდა იყოს. ყიფშიძის ქუჩა კი ამის ნათელი მაგალითია. რაც იგეგმება ყიფშიძის 1-ში ეს არის დანაშაული, ჩვენი შვილების წინაშე. სამწუხაროდ, მერიაში, არ ითვალისწინებენ იმ ფაქტს, რომ ტერიტორიაზე იქნება სატრანსპორტო კოლაფსი. ისედაც მძიმე მდგომარეობაშია ქალაქი ამ მხრივ. თბილისი ჰგონიათ სამშენებლო ტერიტორია. მათ არ აქვთ გეგმის სახით გათვლილი, თუ როგორ უნდა გაუძლოს ამ ერთმა ქუჩამ ამხელა დატვირთვას. როგორ უნდა იცხოვრონ ადამიანებმა მიმდებარე შენობებში სადაც ხვალ მზის სხივი არ მისწვდებათ აქ დაგეგმილი მშნებლობის გამო. ჩემთვის და ჩვენი გუნდისთვის ეს ბრძოლა არის ბრძოლა თბილისისთვის და აქ მცხოვრები ადამიანებისთვის", — აცხადებს ანა ბიბილაშვილი.