ევროკავშირის ელჩის საქართველოში, კარლ ჰარცელის განცხადებით, ხელმოწერა იმისა, რაც პირველ რიგში, დემოკრატიული რეფორმების მნიშვნელოვან გზამკვლევს წარმოადგენს, არასდროს არ არის გვიან და შესაძლოა, არც ამ გზამკვლევთან დაბრუნებაა გვიან.

"მოგეხსენებათ, რომ დღეს, ერთიანი ნაციონალური მოძრაობის თავმჯდომარემ ხელი მოაწერა 19 აპრილის შეთანხმებას, რომელიც ევროკავშირის მედიაციით შედგა. მან დოკუმენტს ხელი მოაწერა პარტიის სახელით, ერთიანი ნაციონალური მოძრაობის წევრი პარლამენტარების ჩათვლით და თავი არავის შეუკავებია. ეს კი ნიშნავს, რომ ამჟამად, პარლამენტის 150 არჩეული წევრიდან 147-მა სხვადასხვა ეტაპზე მხარი დაუჭირა შეთანხმებასა და მის შინაარსს, თუმცა, სხვადასხვა დროს. ჩემი აზრით, ხელმოწერა იმისა, რაც, პირველ რიგში, დემოკრატიული რეფორმების მნიშვნელოვან გზამკვლევს წარმოადგენს, არასდროს არის გვიან და, შესაძლოა, არც ამ გზამკვლევთან დაბრუნებაა გვიან", — ამბობს ჰარცელი.

მისივე თქმით, მზად არიან კვლავაც იმუშავონ ყველასთან, ვინც ამ რეფორმების განხორციელების ერთგულია.

"მტკიცედ მჯერა, რომ ეს რეფორმები სარგებელს საქართველოს ყველა მოქალაქეს მოუტანს. სწორედ ამიტომ, ევროკავშირი მიიჩნევს, რომ შეთანხმებით გათვალისწინებული ყველა რეფორმის სრულად შესრულება საქართველოს ეროვნულ ინტერესებშია. ჩვენ კვლავაც მზად ვართ ვიმუშაოთ ყველასთან, ვინც ამ რეფორმების განხორციელების ერთგულია", — ამბობს ელჩი.

დღეს, 1–ელ სექტემბერს, ერთიანი ნაციონალური მოძრაობა შარლ მიშელის შეთანხმებას შეუერთდა და ხელშეკრულებას ხელი მოაწერა. შეგახსენებთ, რომ ქართულმა ოცნებამ შეთანხმება ანულირებულად გამოაცხადა ხელმოწერიდან 100 დღის შემდეგ, მიზეზად კი ის დაასახელა, რომ ენმ-მ ხელი არ მოაწერა და ოპოზიცია ვალდებულებებს არ ასრულებდა.