ლელოს წარმომადგენელი, ანა ნაცვლიშვილი, აცხადებს, რომ პარლამენტს საარჩევნოდ ერთთვიანი არმუშაობის უფლება არა აქვს, რადგან ქვეყანაში უმძიმესი ვითარებაა და მოუწოდებს, დაუყოვნებლივ დაიბარონ იუსტიციის მინისტრი. ეს განცხადება მან დღეს ბიუროს სხდომაზე მას შემდეგ გააკეთა, რაც პარლამენტის თავმჯდომარემ რამდენიმე საკითხის განხილვა და მათ შორის, მინისტრების მოსმენა ერთი თვით გადადო. პარლამენტი, როგორც წესი, არჩევნების წინ ერთი თვით მუშაობას წყვეტს, რათა დეპუტატებს საარჩევნო კამპანიაში ხელი არ შეეშალოთ.

"რა დროს მინისტრის მოსმენის გადადებაა, როდესაც უმძიმესი ვითარებაა ციხეებში და პასუხები ოჯახის წევრებს არ აქვთ. ჩვენმა ფრაქციამ სამი თვის წინ მინისტრის კომიტეტზე მოსმენის საკითხი დააყენა და დღემდე პასუხი არ გვაქვს, როდის მოვა იუსტიციის მინისტრი და გასცემს კითხვებს პასუხებს. ასევე ჯანდაცვის მინისტრი და სხვა მინისტრები. გასაგებია, რომ რეგლამენტში გვიწერია, როგორც წესი, საარჩევნო პერიოდში პარლამენტი არ მუშაობს, მაგრამ ჩვენ დღეს არ ვართ იმ ქვეყნის პარლამენტი, რომელსაც შეუძლია თავის თავს უფლება მისცეს, რომ სტანდარტულად, როგორც წესი, პროცედურით წავიდეს", — განაცხადა ანა ნაცვლიშვილმა.

პარლამენტის თავმჯდომარემ კი ნაცვლიშვილის ამ განცხადებას "სპეკულაცია" უწოდა, რადგან მისივე თქმით, დღეს გააკეთა იუსტიციის მინისტრის განმარტება ციხეებში კოვიდვითარებასთან დაკავშირებით და ინფიცირებულთა რიცხვი საერთო რაოდენობის 1%-ს არ აღემატება.