ეკონომიკისა და მდგრადი განვითარების მინისტრის მოადგილის, მარიამ ქვრივიშვილის განცხადებით, უწყებამ ტურიზმის სფეროში დასაქმებულებისთვის წამახალისებელი სტიმულირების პაკეტი მიიღო, რომელიც ითვალისწინებს იმას, რომ სექტემბერი-ოქტომბრის პერიოდში ვაქცინირებული გიდები სახელმწიფო სერვისებით უსასყიდლოდ ისარგებლებენ.

"ყველა გიდი, რომელიც სრული ორი დოზით იქნება ვაქცინირებული, მომდევნო ორი თვის განმავლობაში, სექტემბერი-ოქტომბრის პერიოდში, ისარგებლებს სახელმწიფო სერვისებით, მათ შორის, როგორიცაა მუზეუმი, დაცული ტერიტორიები და ზამთრის კურორტებზე არსებული საბაგიროებით, სრულებით უსასყიდლოდ", — განაცხადა ქვრივიშვილმა.

მისივე თქმით, საერთაშორისო გამოფენებზე სტიმულირების პაკეტით ისარგებლებენ ის კომპანიები, რომელთა დასაქმებულთა უმრავლესობაც ვაქცინიებული იქნება.

"ყველა კომპანია, რომელთა დასაქმებულების 60% იქნება სრულად ვაქცინირებული, ჩვენ, ამ შემთხვევაში, ტურიზმის ეროვნული ადმინისტრაციის პლატფორმიდან შევთავაზებთ ტურისტულ გამოფენებზე 30%-იან ფასდაკლებას. ხოლო, ყველა ის კომპანია, რომლის თანამშრომლების 80% იქნება სრულად ვაქცინირებული, ისინი ისარგებლებენ 50%-იანი ფასდაკლებით", — აღნიშნა მარიამ ქვრივიშვილმა.

მინისტრის მოადგილის თქმით, მნიშვნელოვანი უცხოელი სტუმრების მიღებისას უპირატესობა მიენიჭებათ იმ ობიექტებს, რომელთა თანამშრომლების 60% მაინც იქნება აცრილი.

"მივიღეთ გადაწყვეტილება, რომ ყველა ტურის დროს, როდესაც ჩვენ ვმასპინძლობთ მნიშვნელოვან სტუმრებს, ჩვენ ავარჩიოთ ისეთი სასტუმროები, კვების ობიექტები თუ სხვა სერვისის მომწოდებლები, რომელთა თანამშრომლების მინიმუმ 60% მაინც იქნება ვაქცინირებული", — განაცხადა ქვრივიშვილმა.