საქართველო ყოველთვის იყო ენთუზიაზმით სავსე ადამიანების ქვეყანა, ადამიანებისა, რომელთაც სჯეროდათ დიდი იდეების, იბრძოდნენ მისთვის და მსოფლიო ისტორიაში დიდ კვალსაც ტოვებდნენ.

ქართული ღვინის კომპანია თბილღვინომ გადაწყვიტა, ერთ-ერთი ყველაზე წარმატებული ქართველის, ნონა გაფრინდაშვილის ისტორია მოეთხრო მცირე საწყისებიდან საერთაშორისო წარმატებამდე. ნონა გაფრინდაშვილმა შეძლო და გახდა ჭადრაკის ისტორიაში პირველი ქალი დიდოსტატი მამაკაცთა შორის.


ვიდეოკლიპიც სწორედ ამ გზის შესახებ მოგითხრობთ, თუ როგორ იწყება ამბავი ზუგდიდის რკინიგზის სადგურიდან და საბოლოოდ მიდის კალიფორნიამდე, ლოუნ პაინამდე, სადაც ყველაფერი გადაწყდა და დაიწერა ისტორია.

ნამუშევარში მთავარი პერსონაჟის ფიქრები, ემოციები და განცდები მხატვრულად არის გადმოცემული და გვიჩვენებს, თუ რამდენად მნიშვნელოვანია წარსული ყოველი დიდი წარმატებისთვის, თუ როგორ გაძლიერებს საწყისი წერტილის ცოდნა მიზნისკენ მიმავალ გზაზე, გამარჯვების შემდგომ ახდენილ ოცნებას კი აზრს ანიჭებს და სხვისთვის შთაგონების წყაროდ იქცევა.


ეს ისტორია ალეგორიულად თბილღვინოს გზაზეც მიგვანიშნებს და გვიჩვენებს, როგორი გამოწვევებით სავსეა მცდელობა, მოუტანო ქართულ ღვინოს მსოფლიო ცნობადობა და წარმატება.

ფოტო: თბილღვინო

ამ გზაზე ერთ-ერთი უმნიშვნელოვანესი წარმატება კი 2020 წელს ლონდონში, მსოფლიოს ერთ-ერთ ყველაზე პრესტიჟულ კონკურსზე The International Wine Challenge, საუკეთესო ღვინოებს შორის თბილღვინოს საფერავის მიერ მოპოვებული ჩემპიონი წითელი ღვინის ტიტულია, რაც ქართული ღვინის ისტორიული გამარჯვებაა.

ვიდეოკლიპის კონცეფცია და სცენარი სააგენტომ Hans & Gruber შექმნა, კლიპის გადაღებაზე კი „კიო ფროდაქშენმა“ რეჟისორ დათო ბორჩხაძესთან ერთად იმუშავა.