პარტია საქართველოსთვის ლიდერი, გიორგი გახარია ამბობს, რომ მათ ჯერ "ნაცები" უნდა დაამარცხონ და შემდეგ შეუდგნენ ხელისუფლებაში სრულად მოსვლას. მისი თქმით, არ შეიძლება ამ პარტიას ჰქონდეს იმხელა მხარდაჭერა, რომ მეორე იყოს და ყველაზე დიდ ოპოზიციას ეძახდეს თავის თავს.

"ზოგიერთმა ვერც გაიგო რას ნიშნავს, როცა ვთქვით, რომ რავის წინააღმდეგ არა ვართ. ზოგიერთმა ისიც ვერ გაიგო როცა ვთქვით, რომ ჩვენ ჯერ ნაცები უნდა დავამარცხოთ და მერე უნდა შევუდგეთ ხელისუფლებაში სრულად მოსვლას. რატომ ვამბობ ამას — რა თქმა უნდა ჩვენ აქ უნდა გავიმარჯვოთ, მაგრამ ნაცების დამარცხება ჩემს გაგებაში ნიშნავს იმას, რომ 9 წლის შემდეგაც, როდესაც ამ ხალხმა ჩვევა და რიტორიკა არ შეიცვალა და მაინც პარლამენტში შევარდნით და ძალადობით უნდათ ხელისუფლებაში მოსვლა — არ შეიძლება რომ ამ პარტიას ქონდეს იმხელა მხარდაჭერა, რომ მეორე იყოს და ყოველთვის ყველაზე დიდ ოპოზიციას ეძახდეს თავის თავს. ეს ვიგულისხმე, ეს ძალიან სწორია და დღესაც ამავე აზრზე ვარ", — ამბობს გახარია.

მისივე თქმით, ქართულ ოცნებაში მთავარი პრობლემა ის, რომ "ახალმა გამოჩეკილმა ბოსებმა" გადაწყვიტეს პარტიის ინტერესები ქვეყნის ინტერესებზე მაღლა დაეყენებინათ.

"ყველას უნდა გვესმოდეს, რომ ჩვენც ოცნებიდან მოვდივართ, მეც ოცნებიდან მოვდივარ. ჩვენ ეს არც გაგვიკეთებია და არ უნდა ვიკადროთ, ჩვენი წარსულ არ უნდა ვლანძღოთ და ვაძაგოთ, იმის მიუხედავად, მათ რაც არ უნდა იკადრონ. იქ ჩვენი ბევრი ღირსეული მეგობარი დარჩა. ოცნებაში მთავარი პრობლემა იყო, რომ რაღაც მომენტში პარტიამ უბრალოდ გადაწყვიტა, პარტიის იმ ვიღაც ახალმა გამოჩეკილმა ბოსებმა გადაწყვიტეს, რომ პარტიის ინტერესები უნდა დაეყენებინათ ქვეყნის და სახელმწიფოს ინტერესებზე უფრო მაღლა. ეს იყო ჩემთვის მიუღებელი და ამიტომ წამოვედი", — თქვა გახარიამ.