ფინანსთა მინისტრი, ლაშა ხუციშვილი ამტკიცებს, რომ ქართული ოცნების რეიტინგი შემცირებული არ არის. ასე უპასუხა მან ჟურნალისტის კითხვას პრემიერმინისტრის, ირაკლი ღარიბაშვილის მიერ დაანონსებულ ხელფასების მატების შესახებ — რატომ ახლა, წინასაარჩევნოდ, როცა ვიცით, რომ ქართული ოცნების რეიტინგი არის შემცირებული? არ ნიშნავს ეს იმას, რომ ერთგვარად ეს არის საჯარო მოხელეების მოსყიდვა?

"არ ვიცი, თქვენ საიდან იცით, რომ ოცნების რეიტინგი არის შემცირებული, ეს ასე ნამდვილად არ არის. რაც შეეხება, რატომ ახლა — ეს იმიტომ ხდება ახლა, რომ ახალი ბიუჯეტის პროექტზე მუშაობის დაწყების პერიოდია და შესაბამისად, ყველა ის საკითხი, რომელიც იქნება საბოლოო ჯამში შეთანხმებული და მიღებული, რა თქმა უნდა, ეს უნდა იქნას გამყარებული საბიუჯეტო დაფინანსებით და ბიუჯეტის შემუშავების პროცესში სრულად უნდა იყოს ჩართული. შესაბამისად, ზუსტად ახლაა ის პერიოდი, როცა ამაზე უნდა იყოს მსჯელობა", — განაცხადა მან.

თვითმმართველობის არჩევნებამდე 2 თვეზე ნაკლებია დარჩენილი პრემიერმინისტრი კი საჯარო მოხელეებისთვის ხელფასების ზრდაზე ალაპარაკდა. დღეს, 9 აგვისტოს ღარობაშვილმა თქვა, რომ 2022 წლის იანვრიდან ეტაპობრივად დაიწყებენ მათი ხელფასების ზრდას.