მდგრადი განვითარების საერთაშორისო ინსტიტუტის (IISD) და ანალიტიკური ცენტრის მსოფლიო გამოცდილება საქართველოსთვის (WEG) კვლევის მიხედვით, საქართველო, ენერგეტიკის სფეროში, ყოველწიურად, სუბსიდირების სახით 500 მილიონ ლარზე მეტს ხარჯავს.

კვლევაში აღნიშნულია, რომ ენერგიის ფასების სუბსიდირება ბაზრის ეფექტიან ფუნქციონირებას ხელს უშლის, იწვევს ენერგიის უყაირათო მოხმარებას და იმპორტზე მეტ დამოკიდებულებას.

"მოსახლეობისთვის ტარიფების დაბალ ნიშნულზე შენარჩუნება ეკონომიკის სექტორისათვის მაღალი გადასახადების დაწესების ხარჯზე ხდება, რაც შედარებით ჩამორჩენილი, გარდამავალი ეკონომიკის ქვეყნებისათვის არის დამახასიათებელი," - აღნიშნულია კვლევაში.

ორგანიზაციები, 2012-2014 წლების მონაცემებზე დაყრდნობით, სახელმწიფოს მიერ ყოველწლიურად გაწეული სუბსიდირების შესახებ შემდეგ ინფორმაციას აქვეყნებენ:

  • 350 მილიონ ლარის სუბსიდირება ხდება საყოფაცხოვრებო მომხმარებლისთვის გაზზე და ელექტროენერგიაზე შედარებით დაბალი ტარიფის დაწესებისთვის;
  • თბოელექტროსადგურების დღგ-გან გათავისუფლება იმპორტირებული ბუნებრივი გაზის მოხმარებისთვის ქვეყნის ბიუჯეტს 30 მილიონი ლარი უჯდებოდა;
  • ელექტროენერგია უსასყიდლოდ მიეწოდება რუსეთის მიერ ოკუპირებულ აფხაზეთს, რომელიც ყოვეწლიურად სულ უფრო და უფრო მეტ ელექტროენერგიას მოიხმარს. ამისათვის ბიუჯეტიდან დაახლოებით 160 მილიონი ლარი გამოიყოფა;
  • დაახლოებით 5 მილიონი ლარი იხარჯება ბიუჯეტიდან ყაზბეგის და დუშეთის მუნიციპალიტეტების ოჯახებისთვის ზამთარში უფასო გაზის მიწოდებაზე. ასევე უფასოდ მიეწოდება ელექტროენერგია სვანეთის მოსახლეობის ნაწილს, რისი შეფასებაც ვერ მოხერხდა არასაკმარისი ინფორმაციის გამო;
  • თბილისის მუნიციპალიტეტი თავისი ბიუჯეტიდან დაახლოებით 25 მილიონ ლარს ხარჯავდა ელექტროენერგიის ვაუჩერებზე მოსახლეობის სოციალური სტატუსის მიუხედავად, რაც მომდევნო წლებში შეიცვალა; სუბსიდირების მოცულობა შემცირდა და უფრო მიზანმიმართული გახდა;