ევროპარლამენტარი, ვიოლა ფონ კრამონი აცხადებს, რომ საქართველოს რუსეთთან დაახლოების მიმართულებით მოძრაობები შეინიშნება. ევროპარლამენტარმა თბილისში გამართულ პრესკონფერენციაზე აღნიშნა, რომ მნიშვენლოვანია ყველა ის შეთანხმება შესრულდეს, რომლის რატიფიკაცია მთავრობამ მოახდინა.

"ეტაპობრივად არის რუსეთთან დაახლოება. მაგალითად, ასეთ გადაწყვეტილებებს [ქართული ოცნების მიერ მიშელის დოკუმენტის ანულირება] რუსეთი მიესალმება. იქ საუბარია ფრენების აღდგენაზე, ნელ-ნელა ნამვდილად უახლოვდებიან რუსეთს. ჩემი გადასაწყვეტი ეს არ არის, მე აქ პროტესტს ვერ გამოვთქვამ, ეს მთავრობის გადასაწყვეტია. აქ მნიშვნელოვანია, რომ თქვენ [ჟურნალისტები] იყოთ დაცულები ქუჩაში, ვიზალიბერალიზაციის, ევროკავშირთან ასოცირების ხელშეკრულება და ყველა ის შეთანხმება შესრულდეს, რომლის რატიფიკაცია მოახდინა მთავრობამ. და თუ ექნებათ უფრო მჭიდრო ურთიერთობა, ეს მათი გადასაწყვეტია. მაგრამ თუ ასოცირების ხელშეკრულებას რეგულარულად დაარღვევენ, მაგალითად, პრესა იქნება წნეხის ქვეშ, ეს ერთ-ერთი ევროპული ღირებულების დარღვევაა", — აღნიშნა კრამონმა.

ევროპარლამენტარმა, ასევე, ქართული ოცნების მიერ მიშელის დოკუმენტის ანულირებაზე განაცხადა, რომ პირველად არ ხდება, როდესაც ქართული ოცნება თავის დაპირებას არ ასრულებს. ევროპარლამენტარის თქმით, შეთანხმების გაუქმება ნდობას არღვევს და ქართულ ოცნებას ხდის ისეთ სუბიექტად, რომელიც არ არის სანდო.

მისივე თქმით, ამ გადაწყვეტილების შემდეგ საქართველო ევროკავშირს კიდევ უფრო დაშორდა. როგორც მან თბილისში გამართულ კონფერენციაზე აღნიშნა, მმართველმა პარტიამ ქვეყნისთვის დამაზიანებელი გადაწყვეტილება მიიღო.

ევროპარლამენტარმა, ასევე, აღნიშნა, რომ, ერთიანი ნაციონალური მოძრაობის არაკონსტრუქციულმა ქმედებებმა და მისმა უარმა ხელი მოეწერა ხელშეკრულებისთვის, ქართულ ოცნებას საკმაოდ ხელსაყრელი ქვეტექსტი მისცა.

გაიგე მეტი: