სტრატეგია აღმაშენებლის ლიდერი დიპლომატიურ კორპუსს და პირადად აშშ-ის და ევროკავშირის ელჩებს მიმართავს და სთხოვს, რომ ქართული ოცნება აიძულონ, დაუბრუნდეს შარლ მიშელის შეთანხმებას და შეასრულოს აღებული ვალდებულებები. ამის შესახებ გიორგი ვაშაძემ საგანგებოდ გამართულ ბრიფინგზე მმართველი პარტიის გადაწყვეტილების საპასუხოდ განაცხადა.

"როცა ჩვენ ამ დოკუმენტზე ვაწერდით ხელს, მისი შესრულების მთავარი გარანტია იყო თქვენი მონაწილეობა. რა თქმა უნდა, ჩვენ ქართულ ოცნებას არ ვენდობოდით იმიტომ, რომ ისინი ჩვეულებრივი თაღლითები არიან და დღეს კიდევ ერთხელ დაადასტურეს, მაგრამ სწორედ თქვენი უშუალო მხარდაჭერისა და გარანტიების ქვეშ ჩვენ ამ დოკუმენტს ხელი მოვაწერეთ. ამიტომ დადგა დრო, აღსრულების კონკრეტული მექანიზმები იქნას გამოყენებული ქართულ ოცნებასთან მიმართებაში, რომ დაუბრუნდეს შარლ მიშელის დოკუმენტს და შეასრულოს ვალდებულებები", — აცხადებს ვაშაძე.

მისი თქმით, დღეს კიდევ ერთხელ დადასტურდა, რომ ქართულ ოცნებას არ უნდოდა არანაირი შეთანხმების გაფორმება და შარლ მიშელის დოკუმენტზე ხელმომწერმა პოლიტიკურმა ძალებმა და დიპლომატიურმა კორპუსმა აიძულა ისინი, წასულიყვნენ ამ შეთანხმებაზე.

ვაშაძე აღნიშნავს, რომ ქართულ ოცნებას დათქმული 43%-იანი ბარიერის ეშინია და ამის გამო თვითნებურად უარს ამბობს იმ დოკუმენტზე, რომელიც ქართველი ხალხის დიდი ნაწილის არჩევანია.

"ქართულმა ოცნებამ მოსახლეობის 70%-ს, რომელიც ყველა კვლევით, აბსოლუტურად პოზიტიურად აფასებს შარლ მიშელის დოკუმენტს, უთხრა, რომ უნდა, გავიდეს ამ დოკუმენტიდან. პირველ რიგში, ბატონ ირაკლის მინდა, მივმართო, რას ნიშნავს, უნდა გახვიდეთ? ვის ჰკითხეთ? საქართველოს მოქალაქეებს ჰკითხეთ? ხელმომწერებს ჰკითხეთ? თუ ჩვენ დასავლელ პარტნიორებს ჰკითხეთ, რომელთაც გაიძულეს, რომ ხელი მოგეწერათ ამ დოკუმენტზე. კიდევ ერთი მაინტერესებს, ბატონო ირაკლი, რის ანულირებას ახდენთ? საქართველოს ევროპული ინტეგრაციის გზის ანულირებას ახდენთ თუ ნატო-ში ინტეგრაციის?" — მიმართავს ვაშაძე ირაკლი კობახიძეს, რომელმაც დღეს მმართველი გუნდის გადაწყვეტილება გაახმოვანა.

ვაშაძე ამბობს, რომ ოპოზიცია არაფერს დათმობს და ბრძოლას ბოლომდე აპირებს. ის დარწმუნებულია, რომ ვადამდელი არჩევნები აუცილებლად დაინიშნება.

ქართულმა ოცნებამ დღეს განაცხადა, რომ შარლ მიშელის შეთანხმება ანულირებულია. პარტიის თავმჯდომარის, რაკლი კობახიძის თქმით, შეთანხმებას მხოლოდ თავად ასრულებენ, რაც არასწორად მიაჩნიათ. მან ოპოზიციას დააბრალა შეთანხმების არშესრულება. ამასთან, მისივე თქმით, ქართული ოცნება უარს ამბობს აქამდე დაპირებულ 43%-იან ბარიერზე და აცხადებს, რომ ახალი არჩევნები მათი "კეთილი ნებით" 53%-ის მიღების შემთხვევაშიც ჩატარდება, თუ გადაწყვეტენ, რომ ოპოზიცია მზად არის კოალიციური მმართველობისთვის.