საქართველოს ახალგაზრდა იურისტთა ასოციაციის თავმჯდომარე, ნიკა სიმონიშვილი ქართული ოცნების მხრიდან შარლ მიშელის დოკუმენტის ანულირებასთან დაკავშირებით ამბობს, რომ ეს უკან გადადგმული ნაბიჯი და დაბრუნებაა 19 აპრილამდე არსებულ მდგომარეობაში.

"ის, რომ ქართული ოცნება შეთანხმებას არღვევდა ჩვენ მედიატორების მხრიდანაც მოვისმინეთ ამაზე განცხადება, მათ შორის სასამართლოს ნაწილთან მიმართებით, ქართულმა ოცნებამ დაარღვია შეთანხმება და ამ კონტექსტში ჩვენ მოვისმინეთ, ასევე, განცხადებები იმაზე, რომ შესაძლოა ფინანსური სანქციები ყოფილიყო გამოყენებული. ამ პირობებში, როდესაც ქართული ოცნება, უბრალოდ, ხელს იღებს ამ შეთანხმებიდან, ანუ ანულირებას უკეთებს, როგორც მათ თქვეს, რა თქმა უნდა, ეს არის უკან გადადგმული ნაბიჯი და დაბრუნება 19 აპრილამდე არსებულ მდგომარეობაში მაშინ, იმ პერიოდში, სადაც პოლარიზების დონე იყო საკმაოდ მაღალი და პოლიტიკური კრიზისი ძალიან ღრმა. აქედან გამომდინარე, ეს ნაბიჯი არ შეგვიძლია შევაფასოთ კარგ ნაბიჯად და შეგვიძლია უკან გადადგმულ ნაბიჯად დავინახოთ იმის გამო, რომ ამას, რა თქმა უნდა, დიდი ალბათობით, მოჰყვება ღრმა პოლიტიკური კრიზისი", — განაცხადა სიმონიშვილმა.

ქართულმა ოცნებამ პოლიტსაბჭოსა და უმრავლესობის სხდომების შემდეგ ბრიფინგი გამართა სადაც განაცხადა, რომ ოპოზიციასთან ევროკავშირის მედიაციითა და შარლ მიშელის პირადი ჩართულობით მიღწეული შეთანხმება ანულირებულია. ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.