დაავადებათა კონტროლის ცენტრის დირექტორის, ამირან გამყრელიძის განცხადებით, ამ ეტაპზე მკაცრი, სრული ლოქდაუნი არ განიხილება. მისი თქმით, განიხილავენ რეკომენდაციების მაქსიმალურად აღსრულებას და დიდი თავშეყრების აკრძალვას.

საკოორდინაციო საბჭოს წევრი ამბობს რომ, არ არის კმაყოფილი ვირუსის საპრევენციო ღონისძიებების აღსრულებით და ამაზე პასუხისმგებელია ყველა, მათ შორის, ისიც. როგორც გამყრელიძემ აღნიშნა, მუშაობენ საწოლების მობილიზაციასა და სასტუმროებში ადგილების გამოყოფაზე.

"ინფიცირების ასეთი მატება უკავშირდება, როგორც ახალი შტამების გავრცელებას, ისე, ზოგადად, ვირუსის ცირკულაციის გავრცელებას", — განაცხადა მან.

შემთხვევათა მატებასა და შეზღუდვებზე ისაუბრა პაატა იმნაძემაც. მისი თქმით, "ჭრელო პეპელას ვარიანტია", რადგან აქამდე ხალხი იმაზე წუწუნებდა, რატომ იყო შეზღუდვები, ახლა კი ჰგონიათ, რომ შეზღუდვები საჭიროა.

"არავითარი ლოქდაუნი არ განიხილება, მთელი წელი იყო ამაზე ლაპარაკი, რატომ არის შეზღუდვებიო. დღეს არის მართვის სხვა საშუალებები. პირველი, რომ ავიცრად და მეორე — ვატაროთ ნიღაბი", — განაცხადა იმნაძემ.

გამყრელიძემ განმარტა, თუ რა ტიპის შეზღუდვებს განიხილავენ. მისი თქმით, საბჭოს რეკომენდაცია მისცეს დიდი თავშეყრებისა და ქორწილების აკრძალვაზე.

"ჩვენი რეკომენდაცია, რომელზედაც მუშაობს საკოორდინაციო შტაბი, რომ თუ მიიღებენ გადაწყვეტილებას, მიეცეს მას ლეგალური ფორმა, რომ ყოველგვარ თავშეყრაზე, სემინარი, კონფერენცია, კონცერთი თუ ა.შ. დაშვებული იყვნენ მხოლოდ ორჯერადად აცრილი ან წინასწარ გატესტილი ადამიანები", — განაცხადა მან.

დღეს საქართველოში კორონავირუსით ინფიცირების 3 666 შემთხვევა დაფიქსირდა. გარდაიცვალა 17 ადამიანი.