საქართველოს პარლამენტის თავმჯდომარის განცხადებით, 5-6 ივლისს, ჰომოფობიურ და ძალადობრივ აქციაზე დაშავებული ჟურნალისტების სტუმრის სტატუსით პარლამენტში არშეშვების მიზეზი არის ის, რომ სხდომის ჩაშლის მცდელობას ვერ დაუშვებდა. დღეს პარლამენტში მედია შეზღუდული რეჟიმით დაუშვეს. კერძოდ, შენობაში შესვლის საშუალება მიეცა მედიასაშუალებების სამ-სამ ჯგუფს, წინასწარ დაშვებული საშვებით. პარლამენტში შესვლისას კი ჩანთები გახსნეს და ხელით შეამოწმეს.

კახა კუჭავამ რამდენჯერმე გაიმეორა, რომ ყველა ჟურნალისტს, ვისზეც საშვი მოითხოვეს, შესვლის უფლება მიეცა. სალომე სამადაშვილის თქმით კი, ისინი ითხოვდნენ სტუმრის სტატუსით იმ ჟურნალისტების შეშვება, რომლებიც ძალადობრივ აქციაზე დაშავდნენ.

"რატომღაც ჩათვალეთ, რომ დაზარალებულ ჟურნალისტებს არ ჰქონდათ უფლება დასწრებოდნენ სხდომას და ეს ჩემთვის არის გაუგებარიც და მიუღებელიც", — თქვა სამადაშვილმა.

კუჭავამ ისევ გაიმეორა, რომ მედიის მიერ წარმოდგენილ სიაში მყოფი ჟურნალისტები შენობაში შევიდნენ, სტუმრის სტატუსით არდაშვებულ ჟურნალისტებზე კი ასეთი განმარტება გააკეთა:

"დღეს ამ დარბაზში მათ შორის არიან ის ჟურნალისტებიც, გარკვეული რაოდენობა მათი, ვინც დაზარალებულად იქნა ცნობილი, ამიტომ მედიასაშუალებებს მიეცათ საშუალება წარმოედგინათ სია, ვინ სურდათ დასწრებოდა, ძალიან მარტივია. რაც შეეხება სტუმრებს, ზოგადად, უსაფრთხოებიდან გამომდინარე და კარგად გვახოვს ჩვენ, წინა რიგგარეშე სხდომა როგორ განვითარდა, ვერ დავუშვებდი, რომ დღეს, უმნიშვნელოვანესი სხდომაზე, სადაც შინაგან საქმეთა მინისტრს უნდა მოვუსმინოთ, ისევ ჩაშლის მცდელობა ყოფილიყო. ჟურნალისტებზე არანაირი შეფერხება არ ყოფილა, ყველაზე დაიშვა საშვი, ვისზეც იყო მოთხოვნა, ეს არის ძალიან მარტივი საკითხი", — თქვა კუჭავამ.