დეკანოზი ზაზა თევზაძის განცხადებით, ძალადობრივი ჯგუფების მიერ ევროკავშირის დროშის ჩამოგლეჯა იყო ფინალური აკორდი, რომ საბოლოო ჯამში დასამარდეს ის, რისკენაც ქართველ ხალხს აქვს სწრაფვა. ასე აფასებს ის 5-6 ივლისის ძალადობრივ მოვლენებს TV პირველის ეთერში.

"ლუსტრირება მოხდა ჩვენი საზოგადოების. საზოგადოების თუ მთლიანობაში ვიტყვით ჩვენ სად ვიმყოფებით, როგორ ვაფასებთ მოვლენებს, რა ხდება ეკლესიაში, პოლიტიკაში და ასე შემდეგ. რა მიზანმიმართულებები გააჩნია ქართულ სახელმწიფოს, საზოგადოებას. ეგ არის მთელი რიგი საკითხები, რომელიც ჩვენ გვაფორიაქებს და ემოციით გვტვირთავს.

პირველ რიგში, ჩვენ რასაც წავაწყდით, ეს იყო მიზანმიმართული ქმედება, არნახული ჟურნალისტების წინააღმდეგ. მარტო ჟურნალისტები იქ არ ყოფილან და ბევრ ასპექტზე აისახა. ევროკავშირი და გაერო ეს იყო კულმინაცია, ევროკავშირის დროშა ეს იყო ფინალური აკორდი იმის, რომ საბლოო ჯამში დასამარდეს ის, რისკენაც აქვს სწორება ქართველ ხალხს", — განაცხადა მან.

მისივე თქმით, არავინ არ შემოვა ქვეყანაში, სადაც ასეთი საშიშროებაა.

"ეს არის სრული გაუცხოვება, სრული განზიდვა იმ ადამიანებისა, რომლებსაც ოდესმე აინტერესებდათ ღვინის სამშობლოში, ერთ-ერთ უძველეს ცივილიზაციის კერაზე მოსვლა და ნახვა. მაგრამ როდესაც ამას აწყდებიან, ბუნებრივია, არავინ არ ურჩევს ასეთ ქვეყანაში შემოსვლას. დაახლოებით, ჩვენ ასეთ მდგომარეობაში ვართ", — თქვა მან.

ძალადობრივი და ჰომოფობიური აქციის მონაწილეებმა პარლამენტთან ევროკავშირის დროშა 2-ჯერ ჩამოგლიჯეს და დაწვეს. ბოლო შემთხვევა 6 ივლისს მოხდა, როცა პოლიციამ ჟურნალისტები და აქტივისტები პარლამენტის ტერიტორიას განარიდა და ისინი შეუშვა. 7 ივლისს პარლამენტის თავმჯდომარემ, კახა კუჭავამ დროშა ხელახლა დაკიდა.

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.

6 ივლისის ძალადობის გასაპროტესტებლად მდუმარე აქცია გაიმართა, სადაც მოძალადეები მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. პოლიცია მოძალადეებს აკავებდა, თუმცა საღამოს, სამართალდამცავებმა აქციის მონაწილეები და ჟურნალისტები ტერიტორიიდან გაიყვანა და მოძალადე ჯგუფები რუსთაველზე შეუშვა. მათ მეორედ ჩამოგლიჯეს და დაწვეს ევროკავშირის დროშა.

ამ ძალადობრივი მოვლენების გამო სამოქალაქო საზოგადოებისა და ოპოზიციის ნაწილს მიაჩნია, რომ შინაგან საქმეთა მინისტრის პასუხისმგებლობის საკითხი უნდა დადგეს, რადგან მან ვერ უზრუნველყო მშვიდობიანი მოქალაქეების და ჟურნალისტების უსაფრთხოების დაცვა.