ახალგაზრდამ, რომელმაც რამდენიმე დღის წინ მდინარე ქციაში დიდი რაოდენობით პლასტმასის ბოთლები გადაყარა, დღეს თავად მიიღო მონაწილეობა მიმდებარე ტერიტორიის დასასუფთავებლად გამართულ აქციაში.

21 წლის რაფიკი ქართული ინოვაციური საწარმოს, ტენეს, ინიციატივას შეურთდა, რომელიც რამდენიმე საათის წინ დაანონსდა. ეკომეგობრული USB კაბელების მწარმოებელმა კომპანიამ ფეისბუქზე ღონისძიება — ვალაგებთ ბოლნისს — შექმნა და მოხალისეები გარემოს დასასუფთავებლად სოფელ ნახიდურში მიიწვია. დღეს კი ცნობილი გახდა, რომ მასში მონაწილეობა რაფიკმაც მიიღო.

"ვიპოვეთ კაფე და გავიცანით მისი თანამშრომელი რაფიკი, რომელმაც თქვა, რომ არ იცოდა, სად გადაეყარა კაფეში დაგროვებული დიდი რაოდენობით ბოთლი და ამიტომ მისი გადაყრა მდინარე ქციაში გადაწყვიტა, რითიც ახლა არ ამაყობს", — წერს ტენე ფეისბუქგვერდზე.

როგორც კომპანია აცხადებს, ისინი კაფეს ადმინისტრაციასთან შეთანხმდნენ, რომ 10 დღეში ერთხელ პლასტმასის ბოთლებს ისინი ტენეს ქარხანას გადასამუშავებლად გადასცემენ.

ღონისძიების ყველა მონაწილეს ტენეს წარმოებული USB კაბელიც გადაეცა.

ფოტო: Tene - ტენე / Facebook

ვიდეო, რომელშიც ახალგაზრდა მდინარე პლასტმასის ბოთლებს ყრის, რამდენიმე დღის წინ გავრცელდა სოციალურ ქსელში და დიდი გამოხმაურება გამოიწვია. შსს-მ მალევე მოახერხა პირის იდენტიფიცირება და იგი დააკავეს.