ყოფილი პრემიერმინისტრი და პარტია საქართველოსთვის ლიდერი, გიორგი გახარია ამბობს, რომ პარტნიორ ქვეყნებში საქართველოსადმი "ცოტა დაღლილობა და ცოტა იმედგაცრუება" შეიმჩნევა. ამის შესახებ მან ამერიკის ხმასთან ინტერვიუს დროს ისაუბრა.

გიორგი გახარია ვაშინგტონში რამდენიმე კონგრესმენს შეხვდა, მანამდე ის ბრიუსელში იმყოფებოდა, სადაც ევროპარლამენტარებს ესაუბრა. როგორც იგი ამბობს, აშშ-ში მათი მთავარი მიზანი ახალდაფუძნებული პარტიის იდეების გაცნობაა. მისივე თქმით, სტრატეგიული პარტნიორები ღელავენ.

"სამწუხაროდ, ჩვენ რაც შევამჩნიეთ როგორც ბრიუსელში, ისე ვაშინგტონში, ცოტა დაღლილობა საქართველოთი, ცოტა იმედგაცრუება საქართველოთი, მაგრამ რაც ყველაზე მნიშვნელოვანია, ჩვენ დავინახეთ მხარდაჭერა სახელმწიფოსი და საქართველოს მოქალაქეების მიმართ", — აღნიშნა გახარიამ.

ყოფილი პრემიერმინისტრი აღნიშნავს, რომ "დაღლილობა" შეეხება კონკრეტულ პოლიტიკურ პროცესებსა და პოლიტიკურ პარტიებს.

"ეს დაღლილობა მხოლოდ ბრიუსელსა და ვაშინგტონში არაა, თბილისშიც არის. ჩვენი მოქალაქეებიც დაიღალნენ. სამწუხაროდ, ქართული პოლიტიკა შინაარსისგან დაიცალა, ჭორაობაში გადაიზარდა", — აღნიშნავს გიორგი გახარია.