საქართველოს პარლამენტის წევრის, დავით ბაქრაძის განცხადებით, მისი რეიტინგი "არსადაც არ გამქრალა". ამის შესახებ მან საკუთარ Facebook-ზე დაწერა და ასე გამოეხმაურა Edison Research-ის ახალ კვლევას პოლიტიკოსების რეიტინგის შესახებ.

"სამწუხაროდ, პოლიტიკოსების პიროვნული რეიტინგების კვლევის ნაწილში რატომღაც არ აღმოვჩნდი ჩართული და შესაბამისად, არც კვლევის საბოლოო შედეგში ვარ მოხსენებული. მინდა დავამშვიდო ყველა, ვინც ბოლო ერთი საათის განმავლობაში მიკავშირდება და აინტერესებს, სად გაქრა ჩემი რეიტინგი — არსადაც არ გამქრალა, მეგობრებო, უბრალოდ, ჩემთვის გაუგებარი მიზეზების გამო, საერთოდ არ გამზომეს. არ იღელვოთ, აგული ერისთავის არ იყოს, ცოცხალი ვარ და გამოფენებშიც ვიღებ მონაწილეობას", — წერს ის.

ის იმედს გამოთქვამს, რომ კვლევის დამკვეთი გაითვალისწინებს და სამომავლოდ აღარ დაუშვებს "მსგავს გაუგებარ შეცდომას". ბაქრაძე მთლიან კვლევასაც აფასებს და აცხადებს, რომ ოპოზიციის კოორდინირებული მოქმედებების შემთხვევაში ადგილობრივ არჩევნებზე ქართული ოცნების დამარცხება და რიგგარეშე საპარლამენტო არჩევნების დანიშვნა "გარდაუვალია".

"სწორედ ეს უნდა იყოს ახლა ოპოზიციის მთავარი ამოცანა და მზად ვარ, ჩემი შესაძლებლობების ფარგლებში, მაქსიმალურად მივიღო მონაწილეობა ამ მიზნის მიღწევაში, რაშიც, იმედია, ჩემი არგაზომილი, მაგრამ არგამქრალი რეიტინგიც დამეხმარება", — ამბობს ბაქრაძე.

24 ივნისს ტელეკომპანია ფორმულას დაკვეთით ჩატარებული Edison Research-ის კვლევის შედეგები გამოქვეყნდა. კვლევის მიხედვით, გიორგი გახარიას მიმართ გამოკითხულთა 57% დადებითადაა განწყობილი, 50% კახა კალაძის მიმართ, ხოლო 47% ნიკა მელიას მიმართ. ამასთან, 43%-ს დადებითი განწყობა აქვს სტრატეგია აღმაშენებლის ლიდერის, გიორგი ვაშაძის მიმართ, რომელსაც შემდეგ ქართული ოცნების ყოფილი თავმჯდომარე, ბიძინა ივანიშვილი 38%-ით მოსდევს.