ინფორმაციის თავისუფლების განვითარების ინსტიტუტის შეფასებით, ჯარიმების გაუქმებაზე გამოცხადებული ამნისტიით, სახელმწიფო თავადვე აკნინებს მის მიერ გამოყენებული ან მომავალში გამოყენებადი შეზღუდვების ლეგიტიმურობას.

"ვაქცინაციის მიმდინარე ტემპის გათვალისწინებით, სავარაუდოა, რომ საქართველო კვლავ დადგება შეზღუდვების დაწესების საჭიროების წინაშე. ამნისტიის გამოცხადება მნიშვნელოვნად წაახალისებს Covid რეგულაციების დარღვევის ფაქტებს მომავალში, რაც თავის მხრივ, სახელმწიფოსგან რეპრესიული მექანიზმების გაძლიერებას გამოიწვევს. აღნიშნულს, გარდაუვლად მოჰყვება ადამიანის ძირითადი უფლებების დარღვევის ფაქტები", — წერია განცხადებაში.

IDFI აღნიშნავს, რომ მაშინ, როცა პარლამენტმა მთავრობისთვის რეგულაციების დასაწესებლად საჭირო უფლებამოსილების გაგრძელებას მხარი დაუჭირა, ამნისტიის გამოცხადება ბადებს ეჭვს, რომ ეს გადაწყვეტილება მხოლოდ ადგილობრივი თვითმმართველობის მოახლოებული არჩევნებით ან სხვაგვარი პოლიტიკური მიზნებით არის განპირობებული.

"IDFI-ის არაერთხელ აღუნიშნავს, რომ Covid რეგულაციების შემოღებისა და აღსრულების თვალსაზრისით მრავალი პრობლემა არსებობს, რომლებიც არღვევს ადამიანის ძირითად უფლებებს. მაგალითად, ღია სივრცეში პირბადის ტარების წესის დარღვევისთვის ათი ათასობით უკანონო ჯარიმაა გამოწერილი. თუმცა ამნისტია წარსულისკენ მიმართული აქტია და იგი სისტემური პრობლემების პრევენციას ვერ მოახდენს. მეტიც, მაღალია ალბათობა, რომ სამომავლოდ იგი კიდევ უფრო შეუწყობს ხელს არსებული პრობლემების გამწვავებას", — ნათქვამია განცხადებაში.

მათი შეფასებით, თუ სახელმწიფოს სურს, პანდემიის დროს ადამიანის ძირითადი უფლებების დარღვევის პრევენცია და დაშვებული შეცდომების აღმოფხვრა, მან ამისთვის პრევენციული და შემდგომი რეაგირების ეფექტური მექანიზმები უნდა შეიმუშაოს.

24 ივნისს პრემიერმინისტრმა, ირაკლი ღარიბაშვილმა განაცხადა, რომ კოვიდრეგულაციების დარღვევის გამო დაწესებული გადაუხდელი ჯარიმები გაუქმდება. ღარიბაშვილის თქმით, საუბარია იზოლაციის, კარანტინის და პირბადის ტარების წესის დარღვევის გამო დაკისრებულ დაახლოებით 76 მლნ ლარის გადაუხდელ ჯარიმებზე.