Atypical ნეტფლიქსის ერთ-ერთი საუკეთესო სერიალი მრავალი მიზეზის გამოა, თუმცა მათ შორის ყველაზე მნიშვნელოვანი, ალბათ, მისი მთხრობელი და მთავარი გმირი სემ გარდნერია, რომელმაც პინგვინების შესახებ ყველაფერი იცის. აუტისტური სპექტრის მქონე სემი საკუთარ ყოველდღიურობაზე, ოჯახზე, მეგობრებზე, შეყვარებულზე, სამსახურსა და კოლეჯზე მოგვითხრობს. პრობლემები და გამოწვევები სემს არც სერიალის ბოლო, მეოთხე სეზონში მოაკლდება, რისი დასტურიც ახალი ტრეილერია.

ტრეილერში ნაცნობ და საყვარელ სახეებს შევხვდებით. როგორც ჩანს, ახალ სეზონში არც სემისა და მისი საუკეთესო მეგობრის, ზაჰიდის თანაცხოვრების თანმდევი პრობლემები მოგვაკლდება და არც ქეისის გამბედაობა და იუმორი. ისევ ვიხილავთ სემის მშობლებსა და მის ექსცენტრიულ შეყვარებულ პეიჯს. რაც მთავარია, მეოთხე სეზონი სემის უსაყვარლესი პინგვინების ხილვისა და მათ შესახებ ახალი ფაქტების სწავლის კიდევ ერთი შესაძლებლობა იქნება.

სემის საოცარ სამყაროში მაყურებელმა პირველად 2017 წელს შეაბიჯა და სერიალი მაშინვე გულით შეიყვარა. ბოლო, მეოთხე სეზონის პრემიერა 9 ივლისს შედგება, ამიტომ თუ ჯერ კიდევ არ გინახავს Atypical, დროა, სავარძელში მოკალათდე და პინგვინების შესახებ უფრო მეტი გაიგო!