პარლამენტის დეპუტატი, ნიკოლოზ სამხარაძის თქმით, 20 ივნისის ღამეს საპარლამენტო უმრავლესობის წევრების დიდი ნაწილი საკუთარ კაბინეტებში იყო. ამის შესახებ მან პლენარულ სხდომაზე გამოსვლისას ისაუბრა, სადაც ყოფილი პრემიერმინისტრის, გიორგი გახარიას განცხადება ახსენეს.

"კიდევ ერთი საკითხი, როცა პრემიერ გახარიას გამოსვლაზე საუბრობდით, მე მინდა დაგარწმუნოთ, რომ 20 ივნისს საღამოს უმრავლესობის წევრების ძალიან დიდი ნაწილი იმყოფებოდა პარლამენტში, და იმყოფებოდა თავიანთ კაბინეტებში", — აღნიშნა სამხარაძემ, რომელიც 2016-2020 წლებში პარლამენტის თავმჯდომარის კაბინეტის უფროსი იყო.

8 ივნისს TV პირველთან ინტერვიუს დროს, გიორგი გახარიამ განაცხადა, რომ 20 ივნისს "ბრძოლა გადაიტანა და ვერცერთი ვაჟბატონი" ვერ იპოვა პარლამენტში. მისი თქმით, პარლამენტი ცარიელი იყო და ზოგიერთი დეპუტატი ზარსაც არ პასუხობდა.