ახალზელანდიელი შემსრულებელი და სიმღერების ავტორი, Lorde, ოთხწლიანი პაუზის შემდეგ ახალი მუსიკით ბრუნდება. მუსიკოსმა 7 ივნისს, თავის ვებსაიტზე ახალი სინგლის ან ალბომის გარეკანი გამოაქვეყნა, რომელსაც Solar Power ერქმევა.

როგორც უკვე ვთქვით, ჯერჯერობით უცნობია, რა ტიპის ნამუშევრის გარეკანია სურათი, რომელზეც სანაპიროზე მყოფი ქალი, სავარაუდოდ, თვითონ Lorde არის გამოსახული.

"2021-ში ელოდეთ... მოთმინებითა შენითა", — წერია ვებსაიტზე გარეკანის ქვემოთ.

ფოტო: Lorde.co.nz

მაისში Lorde ბარსელონაში 2022 წლისთვის დაგეგმილ მასშტაბურ ფესტივალ პრიმავერა საუნდზე გამომსვლელთა შორის დასახელდა სხვა ცნობილ პოპვარსკვლავებთან ერთად.

ახალზელანდიელმა მუსიკოსმა ასევე გასულ თვეში მიიღო განსაკუთრებული ჯილდო — 2013 წელს გამოსული მისი ჰიტი, Royals, ციფრულ სტრიმინგ პლატფორმებზე ჯამში მილიარდჯერ მოისმინეს.

ელა მარია ლენი იელიჩ-ო'კონორის, იგივე ლორდის ამ დროისთვის ბოლო ნამუშევარი, მეორე სტუდიური ალბომი Melodrama 2017 წელს გამოვიდა. გასულ წელს მომღერალმა განაცხადა, რომ ანტარქტიდაზე მოგზაურობის შემდეგ ყინულოვანი კონტინენტი მისთვის წიგნისა და ახალი ალბომის შთაგონების წყაროდ იქცა. წიგნი, სახელწოდებით სამხრეთისკენ სვლა, 2021 წელს გამოიცემა და მისი გაყიდვიდან შემოსული თანხა კლიმატის ცვლილების თემაზე ერთ-ერთი სტუდენტის დოქტორის ხარისხის მოსაპოვებელ კვლევას დააფინანსებს.